Diretór Jerál Servisu Migrasaun, Superintendente Asistente Boavida Ribeiro hateten, sidadaun Maldova ne’e nu’udar koletór. Ninia servisu mak koleta osan tuan no osan foun.

Maibé polisia deskonfia sidadaun ne’e envolve iha kazu brankamentu kapitál (money laundry). Ne'e duni, iha loron 19 Marsu 2018 kalan, Servisu Migrasaun hamutuk ho Polisia Nasionál Servisu Investigasaun Kriminál (PNSIK) entrega karta notifikasaun ba nia. Nune’e, loron tuir mai sidadaun aprezenta-aan ba diresaun servisu migrasaun.

Iha ne’ebá, migrasaun haree kualidade dokumentu ne'ebé nia utiliza hodi halo viajen husi ninia nasaun mai to’o iha TL. Dokumentu ne'ebé utiliza maka pasaporte Roménia no pasaporte Maldova.

Hanesan mós ho Timor-Leste, povu Moldova bele iha dupla sidadania. Tanba ne’e, Vladimir utiliza pasaporte Roménia atu fasil asesu ba Europa no Ázia. Atu garante dokumentu ne'ebé sidadaun ne’e uza, Migrasaun koordena ho Interpol-Dili, maibé deteta duni dokumentu sira ne’e orijinál.

La’ós ne’e de’it, kontaktu ne’ebé halo ho autoridade Roménia nian deklara katak dokumentu sidadaun ne’e orijinál no laiha problema.

Nune’e, Servisu Migrasaun entrega fali sidadaun ne’e ba PNSIK hodi haree ba prosesu moeda nian maibé la hetan indikasaun brankamentu kapitál.

Ne’e duni, tuir Servisu Migrasaun sei halo akompañamentu ba sidadaun ne’e hodi haruka fila ba nia rain iha Sesta (23/3).

Tuir prosesu viajen, Vladimir sai husi Moldova mai Roménia iha loron 13 Marsu 2018, hafoin tama Istambúl deskansa loron rua, iha 15 Marsu, mai liu Turkia hafoin tama Malázia. Iha Malázia nia demora durante loron haat. Hafoin loron 19 Marsu tama Singapura depois mai liu Bali no kontinua mai Dili.

Boavida esplika, sistema ne'ebé vigora iha mundu atu kontrolu atividade tama-sai ema estranjeiru sira nian iha nasaun ida nia laran. Polisia la duun ema, maibé deskonfia tanba nasaun ne’e tama iha risku.

Sidadaun Maldova ho pasaporte Roménia tama iha Timor Leste liu husi aeroportu. Sidadaun ne’e hetan revista husi autoridade Alfándega Aeroportu nian tanba lori moeda lubuk ida husi nasaun ualu (8) hanesan Maldova, Roménia, Bulgária, Tajikistaun, Ukránia, Arménia, Malázia no Singapura.

Hafoin halo identifikasaun, Alfándega liu husi rede sosiál deklara katak “Alfandega Aeroportu deteta sidadaun Maldova lori osan ho kuantidade boot mai Timor-Leste sem deklara. Tipu atividade Brankamentu Kapitál. Deteta halo aprensaun hodi submete ba investigasaun”.