Alendé bandu atu ba buka servisu, AD mós lakohi la’en ba servisu, aat liu maka bainhira AS hetan tiha servisu no lorloron bainhira sai ba servisu, AD mós sai husi uma la hatene ba ne’ebé.
Iha oras han meiu dia, ka oras atu han nian, AD nunka prepara hahan ba AS tanba AD mós tur la metin iha uma.
Tanba ne’e, AS lakon pasiénsia hodi ‘hurlele’ AD relasiona ho atitude ne’e.
Tuir akuzasaun ne’ebé Ministériu Públiku (MP) ne’ebé lee sai katak, arguidu ho lezada moris hamutuk hanesan feen – la’en desde tinan 2015, maibé seidauk iha fuan domin (oan).
Iha loron 27 fulan Abril tinan 2016, iha oras tuku 8 kalan iha Metinaru Munisípiu Dili, arguidu sai husi uma ba toba iha ninia apa kiik nia uma, maibé la fó hatene ba lezada.
Situasaun ne’e halo lezada ba buka tuir arguidu atu tama mai uma laran, derrepente arguidu buti lezada nia kakorok.
Iha loron 15 fulan Abril tinan 2016 oras tuku 2 madrugada arguidu ho lezada diskute malu too baku malu, arguidu baku dala barak iha lezada nia isin lolon halo lezada sente moras no bubu makaas.
Tanba ne’e, Ministériu Públiku akuza arguidu ba krime ofensas integridade fiziku simples kunjuga ho lei violénsia doméstika ne’ebé previstu iha artigu 145 husi kodigu penál.
Hataan ba akuzasaun hirak ne’e, arguidu deklara katak, iha faktus los hotu, tanba iha momentu ne’ebá arguidu sai duni husi uma maibé la fó hanete lezada.
“ha’u ba toba iha ha’u nia apa ki’ik nia uma. Ha’u la fó hatene lezada tanba ha’u ba buka servisu nia la fó. Kuandu ha’u ba servisu, nia mos sai hotu la hatene ba ne’ebé. Ha’u nia hahan deit nia la prepara, tanba ida ne’e mak ha’u baku nia,” dehan arguidu iha sala audiénsia julgamentu Tribunál, Sesta (23/03).
Arguid mós deklara katak, oras ne’e daudaun arguidu ho lezada la moris hamutuk ona, tanba arguidu tauk problema ne’e akontese fila fali.
Rona tiha deklarasaun ne’e, Tribunál adia julgamentu ba fali loron 3 fulan Abril oras tuku 3:00 loraik hodi rona fali deklarasaun lezada nian.
Razaun Tribunál adia julgamentu tanba defeza husi arguidu ba halao julgamentu kontinuasaun iha Gleno Ermera.
Audiénsia julgamentu ne’e prezide husi juis singulár Sribuana da Costa, Ministériu Públiku reprezenta husi Prokuradór Bartolomeu de Araújo, arguidu hetan asisténsia legál husi defensór Públiku Eustáquio Guterres.
