Sábadu, 07 Dezembru 2019 | Login
Florêncio Sanches Florêncio Sanches

Janeiru-Jullu, SERVE Taka Kompañia 72 Featured

DILI: Kompañia nasionál no internasionál ne’ebé loke iha Timor-Leste hamutuk 22.000, maibé dezde Janeiru to’o Jullu 2018, Servisu Rejistu Verifikasaun Emprezariál (SERVE) simu pedidu kompañia besik hamutuk 300 atu taka. Nune’e, ikus mai konsege taka duni kompañia 72.

Diretór Ezekutivu SERVE, Florêncio Sanches hateten, husi totál kompañia sira ne’ebé husu atu taka empreza internasionál ida ho 71 kompañia lokál.

Kauza husi emprezáriu sira ne’e taka sira-nia negósiu iha tanba relasiona ho situasaun polítika ne’ebé afeta ba sira hodi la hetan rendimentu.

Nia akresenta, númeru kompañia iha fulan Maiu sei iha nivel estavel, númeru ne’e tuun kuaze 60% iha fulan Jullu tanba hafoin tomada-de-pose laiha serteza ba polítika Estadu nian.

Maski nune’e, númeru ne’e normaliza hikas fali iha terseira semana fulan Agostu nian, tanba iha kompañia barak maka rejistu no halo renovasaun lisensa.

Sanches esplika, situasaun polítika la'ós TL mesak maka hasoru, iha rai barak enfrenta problema hanesan, maibé emprezáriu sira mantein tanba la depende ba Orsamentu Estadu, maibé ba atividade ekonómika ne’ebé setór privadu sira halo.

“Agora ita nian ne’e buat hotu-hotu depende ba Orsamentu Estadu bainhira orsamentu la pasa maka hanesan ne’e”, tenik nia, iha servisu fatin, Matadouru, horisehik.

Nia hatutan, husu ba maluk sira ne’ebé agora na’in ba kompañia atu labele depende ba iha Orsamentu Estadu, maibé presiza halo atividade ekonómiku ne’ebé produtivu.

Nia fó ezemplu, Governu Xina hatama ona pedidu ba SERVE hodi husu ba Timor-Leste atu hatama produtu agrikultura hanesan ai-farina, sira husu tonelada tokon hotu (7) kada tinan.

Tuir loloos ida ne’e maka oportunidade atu hasa’e ekonomia produtivu setór privadu sira nian, maibé Timor-Leste la konsege responde ba pedidu ne’e.

Read 3539 times Last modified on Kuarta, 29 Agostu 2018 14:45
Rate this item
(0 votes)