Diretór Ezekutivu SERVE, Florencio Sanches informa, iha fulan Janeiru to’o Fevereiru 2021, SERVE simu pedidu atu taka husi kompaña 50 resin.
Husi kompaña 50 resin ne’e, nia hatete, SERVE deside hodi aseita pedidu husi kompaña 10, no kompaña 40 resin seluk sei pendente.
“Pedidu husi Janeiru mai to’o Fevereiru ne’e pedidu liu 50, maibé ita konsege taka de’it 10, ne’ebé restu ne’e pendente hela atu hein prosesu ikus,” dehan Florencio via telefone, Tersa (30/03).
Ba kompaña ne’ebé ninia pedidu pendente, nia dehan, tanba sira seidauk priense kriteria balun no kompaña balun sei iha dividas.
“Peditu taka kompaña iha ninia kriteriu rasik, balun seidauk kumpri kriteriu. Se nia kumpri kriteriu sira ne’e entaun SERVE tenke halo koordenasaun ho Ministériu Finansas liu husi autoridade tributariu katak kompaña sira iha dividas ka la’e. Se kompaña sira iha dividas ita labele taka lai,” dehan nia.
Diretór ne’e deklara triste tanba maioria kompaña Timor-oan mak hato’o pedidu atu taka sira-nia kompaña.
Tuir nia, kompaña Timor-oan sira loloos tenke kompriende katak iha situasaun defisil la presiza atu taka kompaña, maibé taka de’it sira-nia atividade.
“SERVE triste tebes karik empreza Timor-oan mak taka nia kompaña, tanba saida? tanba Timor-oan mak na’in ba rai no estadu ida ne’e, oinsa mak iha uma-laran rasik taka nia odamatan? tanba ne’e husu Timor-oan ho fuan boot nafatin atu labele taka tan kompaña rasik,” nia hatete.
Maske iha kompaña balun ne’ebé taka, maibé nia hatutan iha fulan rua ne’e, Janeiru to’o Fevereiru, iha kompaña foun 1.660 mak mai rejistu.
Númeru foun ne’e, nia dehan, maioria Timor-oan.
“Ida ne’e maioria kompaña nasionál katak empreza Timor-oan sira, tanba saida mak númeru ne’e sa’e maka’as, tanba iha indikasaun katak, liu-liu Timor-oan, ne’ebé espiritu aas tebes iha negosiu hatan ba nesesidade ne’ebé estadu iha,” nia hatutan.
Nia dehan, SERVE hakarak atu númeru empreza sa’e no aumenta ba bebeik hodi hetan rendimentu ba nia an no familia no mós loke kampu serbisu, no bele kontribui ba taxa ka reseitas ba estadu, liu husi 10% ne’ebé atutoridade finansas koleta.
Entretantu, total númeru kompaña ne’ebé rejistu husi tinan 2013 to’o Fevereiru 2021 hamutuk 35.000.
Husi númeru ne’e, kompaña Timor-oan ho porsentu 80 no kompaña internasionál 20%.
“Rihun 35 maioria sei ativu hotu, la sura sira ne’ebé taka tiha ona, husi númeru ne’e 60% halai liu ba iha area kontrusaun, 40% de’it mak iha area produtivu hanesan agrikultura no seluk tan,” dehan nia.
Molok ne’e, Diretór Ezekutivu Forum Organizasaun Naun-Governamental Timor-Leste (FONGTIL) Daniel Santos do Carmo hatete, bainhira implementasaun serka sanitaria prolonga nafatin sei fó impaktu ba ekonomia rai laran, liu-liu ba emprezariu sira.
Jornalista: Mariano Mendonça
Editor: Jorjino dos Santos
