Tuir Primeiru Ministru (PM), Taur Matan Ruak hatete, hahalok ema ida-idak nian mak sei garante salvaguarda nia moris rasik no sei salva ema seluk nia moris no mós família sira nia moris.

Ema hotu tenke fó hanoin ba malu kona-ba esforsu no hahalok responsável ne’ebé adota iha tinan kotuk, atu bele rekupera prátika di’ak no komportamentu sira ne’ebé evita ona hodi redús mate no propagasaun husi moras ne’e durante tinan 2020 nia laran iha Timor-Leste.

“Atu ita bele fila-fali ba ita-nia moris normál sein rejistu mate sira nian, ha’u apela ba hotu-hotu, sein exesaun, katak ita kumpri medida sira prevensaun nian ne’ebé hala’o hela, atu nune’e kontribui hodi evita propagasaun husi moras ida-ne’e iha ita-nia país,” dehan nia iha aprejentasaun extensaun Estadu Emerjensia ba EE-12, iha PN, (31/03).

Nia deklara, iha tinan kotuk Timor-Leste hetan rekonhesimentu husi komunidade internasionál hanesan país ualu ne’ebé hetan susesu di’ak iha jestaun Covid-19 nian, hanesan ho Nova Zelándia no país sira seluk.

Maibé, rezultadu di’ak sira ne’e agora iha hela prova husi vaga moras foun ida ne’e nian, ne’ebé agresiva no ezijente liu.

Tanba ne’e, Governu kontinua halo buat hotu ne’ebé nia bele halo, tantu iha nível nasionál no nível internasionál, ho Parseiru Bilaterál, Rejionál no Multilaterál sira, atu bele asegura akompanhamentu saúde Timoroan hotu nian.

“Iha asuntu ida-ne’e, ha’u hakarak apela ba deputado no deputadu sira, atu bele renova konfiansa no apoiu ne’ebé hatudu ba Governu iha fulan hirak ikus ne’e, hodi autoriza ba renovasaun estadu emerjénsia ba da-12 husi deklarasaun estadu emerjénsia, nu’udar instrumentu fundamentál no insubstituível ne’ebé permite ba ita atu prevene no kombate moras ida-ne’e ne’ebé iha poténsia boot ba mate,”tenik nia.

Primeiru Ministru mós husu ba sidadaun hotu iha fatin  ne’ebé de’it, iha territóriu nasionál no iha rai-li’ur, no mós autoridade no organizasaun sira sosiedade sivíl nian hodi hamutuk luta hasoru moras ida ne’e.

Jornalista: Saturnina da Costa

Editor: Jose Sarito Amaral