Kompañia hirak ne’e simu ona pagamentu husi instituisaun ne’e, maibé to’o agora la fornese kombustivel.

Problema kombustivel ne’e impede servisu PNTL nian lubuk ida, inklui Unidade Polisia Marítima (UMP) hodi halo operasaun iha tasi laran.

Komandante Jerál PNTL, Komisáriu Júlio da Costa Hornai hateten, instituisaun kompleta ona pagamentu ba kompañia sira ne’e, maibé realidade kombustivel seidauk iha.

“Ami hasoru problema ho Kompañia Ruvic, Borala, Lafaek, Arjumer no Nagarajdo. Ami selu tiha ona sira no ami simu tiha ona kupon maibé to’o agora sira la supply mina” dehan nia, iha Kuartél Jerál PNTL, Kaikoli-Dili, horisehik.

Ho problema ne’e, instituisaun PNTL sei bolu kompañia hirak ne’e atu esplika difikuldade ne'ebé iha hodi labele halo fornesimentu kombustivel.

Planu Hari Estasaun Mina

Problema kombustivel ne’ebé akontese sai nu’udar lisaun ba instituisaun PNTL nian. Ne’e duni, sira iha planu harii estasaun kombustivel rasik, nune’e bele diminui problema kona-ba mina.

Maski nune’e, polítika ne’e foin maka proposta, bainhira Governu konkorda instituisaun PNTL prontu atu ezekuta planu ne’e.

“Ami sei esforsa atu esplika vantajen no dezvantajen kona-ba atu harii estasaun kombustivel PNTL nian ba governu”, tenik Komisáriu Júlio.

Tanba buat simples ida mak instituisaun ne’e hanoin atu halo mak buka atu apoiu governu. Tanba planu sira ne’e sei liu husi proposta ida no sei haruka ba governu kuandu sira aseita instituisaun sei halo.