Bainhira hetan transporte balun mak para iha Zebra Cross, Polisia sei prega multa tuir lei kódigu estrada.

Durante ne’e Polisia halo ona sosializasaun ba kondutór sira kona ba funsionamentu zebra cross iha dalan públiku, tanba ema sira ne'ebé la'o ain mak sei utiliza hodi ultrapasa.

Komandante daruak PNTL Munisípiu Dili, Superintendente Asistente Euclides Belo hatoo asuntu ne’e iha komandu PNTL Kaikoli, Sesta (09/03).

Nia dehan, dala barak konxiénsia husi kondutór sira mak seidauk iha, tanba  ne’e polisia sei lori ida ne’e ba sira atu nune’e bele fanun di'ak liu tan sira nia konxiénsia.

“ami halo tiha ona sosializasaun antes no depois hamosu Zebra Cros ne’e. Tanba laiha sinais ida ne’e dezastre bele mosu makaas liu, tanba pasajeiru sira difisil atu ultrapasa ba estrada sorin”, tenik nia.

Tan ne’e polisia tránzitu sei halo kontrola makaas liu tan, atu haree kondutór malandru sira, sei prende sira nia karreta bainhira para arbiru.

Ida ne’e hanesan lisaun ida atu hanorin sira respeita sinais ne'ebé monta ona iha dalan públiku  nune’e mós atu bandu sira labele para iha zebra cros leten.