Tuir Ministru Defeza, Cirílo Cristovão hateten, knaar PNTL no F-FDTL maka atu agrante pás no dame hodi seguransa ba povu tomak tuir eleisaun ho di’ak.
“Páis ida ne’e presiza hakmatek estabilidade iha tinan oin ita hasoru eleisaun rua ne’e difikuldades ba ita nia forsa rua ne’e” dehan Cirílo ba jornalista iha Kuartel Jeneral F-FDTL, Fatuhada, foin lalais ne’e.
MD apela ba komandante sarjentu soldadu sira tenke prepara ho professional atu hasoru dezafia ho kapasidade instituisional, atu nune’e bele hatudu ba mundu nasaun doben TL iha pás no dame.
Ministru Defeza akresenta, mantein pás no estabilidade para mundu internasional haree, TL serve duni ba ukun rasik an.
“Ita atu asegura hamutuk ho PNTL sira nune’e ita nia povu bele ezerse sira nia direitu la’ós ne’e de’it loron 8 Agostu sei iha tomada de posse ba governu foun ita asegura nafatin para governu ne’e bele hametin pás,”dehan Cirílo.
Iha fatin hanesan Xefe Estadu Maior F-FDTL, Koronel Falur Rate Laek dehan, tinan 2017 nia laran forsa armada hasoru duni dezafius boot mak eleisaun jeral presidensial no parlamentar.
“Tinan oin mai ita iha dezafius barak hanesan eleisaun jeral nian tanba festa demokrasia ne’e buat ida ne’ebé konplexu,” dehan Falur.
Nia dehan, PNTL ho F-FDTL tenke servisu hamutuk la bele haree malu hanesan adversariu, prosesu ida deligadu ne’e tanba buat aat ho di’ak iha laran, ne’e atu dezafias kapasidade instituisaun nian hodi hasoru.
