Diretór Jerál Komérsiu Indústria no Kooperativa, Leovigildo dos Santos hateten, laiha eletrisidade fó impaktu boot ba servisu mákina Estadu nian, hanesan funsionáriu públiku labele halo buat ida tanba ahi mate. Bainhira bainaka ruma mai labele halo enkontru tanba nakukun.

“Kuaze fulan ida ami la asesu eletrisidade no fó impaktu boot ba ami nia servisu. Ami tama iha servisu fatin nakukun obrigatóriu lori de’it lámpada telefone nian halo naroman”, dehan nia, iha servisu fatin, Fomentu-Bebora, horisehik.

Tuir nia, ahi mate la’ós impaktu hosi EDTL maibé eletrisidade iha ministériu nian mak hetan problema. Agora atu haruka kompañia balun mai haree hodi halo manutensaun maibé osan laiha atu selu ema. Ne’e duni, sira prepara ona karta hodi haruka ba iha Ministériu Prezidénsia Konsellu Ministru atu haree hodi rezolve urjente.

“Agora ne’e ha’u labele halo servisu. Ha’u kuandu tama iha servisu fatin ha’u uza fali ha’u-nia lampu telefone”, tenik nia.

Tanba ne’e, husu Ministériu Prezidénsia Konsellu Ministru atu haree orsamentu ruma para rezolve, tanba agora servisu komplikadu tebes.

Problema ne’e mosu tanba osan mak laiha atu selu kompañia mai halo manutensaun ba eletrisidade ministériu nian.

Hataan ba preokupasaun ne’e, Xefe Lojístika MKI, Adélia do Rego Fernandes de Araújo hatete, ahi ne’ebé mate la'ós iha parte diresaun komérsiu nian de’it kuaze diresaun ambiente mós mate hotu.

“Iha diresaun balun ami nia tékniku sira bele atende urjente tuir nesesidade ne’ebé ami nia tékniku sira iha”, tenik nia.

Nia esplika, eletrisidade ne’e presiza tebes hodi halo servisu, kuandu laiha sei la halo servisu. Nune’e, parte lojístika labele bolu kompañia atu hadi'a maibé haree mós ba orsamentu.