Ministériu Obras Públika, Transporte no Komunikasaun (MOPTK) ne’ebé responsabiliza programa ne’e sei implementa uluk iha kapital Dili. Daudauk ne’e, harii ona estasaun bee fo’er iha Tibar-Likisa.

Ministru Gaostão Sousa hatete, programa ida ne’e hanesan kompromisiu governu nian hodi buka dalan atu halo jestaun ba bee fo’er ka bee restu.

“Iha futuru ita presiza haree posibilidades no jestaun ne’ebé apropriadu hodi halo tratamentu ba bee fo’er hodi uza hikas atu responde nesesidade ba bee,” informa Gastão iha Tibar, Sesta (24/03).

Iha fatin hanesan, Diretór Jeral Agua no Saneamentu Girgorio da Luz hatete, programa tratamentu bee fo’er ne’e so atu salva de’it ambiente no ekosistema, katak bee ne’e labele oho ikan no animal sira ne’ebé moris iha laran.

Iha faze dahuluk ne’e, nia hatete, bee ne’e komunidade sira seidauk bele atu konsumu.

Entretantu, Primeiru Ministru Rui Maria de Arujo hatete, bee fo’er ka bee restu sira ne’e hafoin prosesa sei sai fali bee ne’ebé moos.

Tuir dadus, PM Rui dehan, kada loron bee ne’ebé sai ba mota no tasi provolta 170.000.

“Ita bele aproveita bee ne’e atu halo inistiva ruma par reforsa tan ekonomia, ita-nia populasaun ne’ebé hela besik bele uza ba rega modo,” dehan nia.

Xefe Governu ne’e hatete, bee iha Timor-Leste sufisiente atu fornese ba komunidade tomak, maibé problema mak mekanizmu akaptasaun no distribuisaun mak seidauk di’ak.

“Agora ita-nia populasaun iha Dili ne’e 250.000 de’it, signifika bee ne’e disponivel loos, ne’e barak, so que ninia distribuisaun mak la la’o,” katak nia.