Liu husi analiza ne’ebé Konsellu Imprensa (KI) hala’o durante ne’e hatudu katak maioria públikasaun notisia ne’ebé media sira públika laiha balansu.

“Uza naran, sumber tungal de’it, la konfirma ho fontes sira seluk, ne’e maioria,” deklara Prezidente KI, Virgilio da Silva Guterres, Sesta (10/02).

Tuir nia, públikasaun hanesan ne’e nudar violasaun ba kodigu etika jornalista nian.

“Tenke konfirma, liliu notisia sira ne’ebé que presiza atensaun ho seriu, tanba envolve ema-nia reputasaun, tanba envolve ema-nia onra, ne’e tenke halo konfirmasaun,” dehan nia.

Dala-barak, nia hatete, notisia sira ne’ebé tuun ona hatete de’it katak ‘to’o notisia ne’e hatun, seidauk konsege kontaktu fonte A k B’.

“(jornalista) sira konfirma de’it ho fraze ida hanesan ne’e,” lamenta Prezidente KI ne’e.

Virgilio dehan, dezde KI hahú eziste to’o ohin loron, kuaze lorloron mosu violasaun ba kodigu etika.

Nia hatete, jornalista la’os public relation ne’ebé tuur iha fatin atu halo kontaktu de’it ba fontes, maibé, jornalista tenke ba hasoru fontes.

“Ami-nia hanoin katak, maluk jornalista sira tenke hadia ida ne’e, konfirma ho fontes hot-hotu,” dehan nia.

Aleinde ne’e, tuir Prezidente KI ne’e iha notisia barak mós jornalista sira la obyektif, katak jornalista sira hatama sira-nia opiniaun iha notisia ne’ebé sira hakerek.

“Jornalista ninia opiniaun labele tama iha notisia ninia laran, notisia ne’e tenke kontein no aprezenta faktus. Se ema baku-malu tenke husu A, B no sasin. Husik ema mak ko’alia la’os jornalista mak hato’o fali nia opiniaun kona-ba asuntu ne’e,” nia hatete.

Nia dehan, durante ne’e KI identifika katak iha titlu notisia jornalista nia opiniaun mak barak. At liu mak molok Tribunal deside ema ida sala, media mak deside uluk tiha ona katak ema ne’e sala.

“Se dehan parteira ida brutal iha klinika ruma, iha ha’u ninia titlu labele tau dehan parteira ne’e brutal, maibé iha ema ruma mak hatete brutal. Ami hanoin violasaun sira ne’e mak ami haree katak aumenta hela de’it, entaun KI sente iha nesesidade atu hato’o ba maluk sira atu haree buat ida ne’e,” nia hatutan.