Deputadu FRETILIN, Fabião Oliveira hatete, pasajeiru sira husi Oekusi no Atauru durante ne’e la hetan tratamentu ida ne’ebé dignu tanba tratamentu ba emprezáriu sira di'ak liu povu baibain.

Haree sistema atendimentu iha portuariu Timor-Leste, liuliu ba administrasaun hamosu tebes diskriminasaun, tanba sira haree liu ba emprezáriu sira duke povu ki'ik sira.

Kuandu emprezáriu sira lori sasán konstrusaun sira atende liu ida ne’e, maibé ba povu nia produtu lokál ne’ebé atu fa'an ne’e sira ladún fó prioridade nune’e balun dala ruma la tula fali.

“Ha’u hanoin ida ne’e governu tenke tau matan hodi hadi'a prosesu ne’e tanba la fó benefísiu ba povu ki'ik sira”, dehan nia, iha Uma Fukun PN, horisehik.

Alende ne’e, iha feri Ró Nakroma nia laran monta ona kadeira, maibé la to’o tanba ne’e pasajeiru ferik-katuas, labarik sira tenke toba iha besi leten durante oras 12, ne’e la'ós tratamentu ne’e di'ak.

Deputadu ne’e, mós halo observasaun katak terminál agora daudaun uza ba feri Ró Nakroma ne’e iha ponte kais Dili ne’e ameasdu ba pasajeiru Oekusi ho Atauru sira nia vida ameasadu tanba movimentasaun konteiner boboot la’o ba mai hela de’it.

Tanba ne’e, husu ba governu liu-liu ba Ministériu Transporte no Telekomunikasaun atu buka terminál alternativa, nune’e pasajeiru sira ne’e bele konsentra hamutuk iha ne'ebá hafoin bele mai sa’e ró ne’e.

To’o notísia ne’e publika diáriu ne’e seidauk konfirmasaun ho parte husi Portuariu Timor-Leste.