Diretór Jerál Alfándega, José António Fátima Abílio hateten, sira prontu buka tuir erru ne’ebé mosu to’o Alfándega la marka prezensa enkontru tolu ne’ebé Konvoka husi Primeiru Ministru.

Bainhira mosu sabotajen iha Instituisaun Alfándega laran, instituisaun Estadu ne’e prontu halo investigasaun kle’an hodi buka tuir, karik funsionáriu sira mak halo sabotajen prontu simu desizaun saida mak Xefe Governu hatán ba sira.

“Ami nu’udar jestor iha Alfándega laran prontu simu desizaun saida mak Primeiru Ministru hatún mai ami, hanesan funsionáriu públiku prontu saida mak orienta mai ami,” dehan nia, iha knaar fatin, horisehik.

Tuir nia, Alfándega laiha hanoin ida atu la kumpre regra ne’ebé Xefe Governu hatún mai instituisaun. Nu’udar individualmente lamenta bainhira simu deklarasaun sira ne’e no prontu simu saida mak Primeiru Ministru preokupa.

Alfándega la hetan karta konvite no mensajen husi Gabinete Primeiru Ministru ba enkontru tolu ne’ebé Primeiru Ministru rasik mak lidera.

Entretantu, tuir deklarasaun ofisial ne’ebé fó sai husi Alfándega deklara, Customs Team tenta atu buka hatene fallansu ne'ebé grave komete husi parte Alfándega hodi la partisipa iha enkontru ho Xefe Governu identifika katak estrutura Alfándega la hetan notifikasaun ruma, konvite, email ka telefone atu marka enkontru

“Karik konvite mai duni maibé la to'o iha instituisaun Alfándega nia liman”, tenik iha deklarasaun ne’e.

Alfándega instituisaun ne'ebé fleksivel atu marka enkontru, la presiza halo apontamentu. Ne’e duni, imposivel bainhira Xefe Governu marka enkontru maibé parte Alfándega tenta atu sabotajen.