Husi asidente bis Perekiki Loiasu diresaun Dili-Suai (kamanasa) ne'ebé mout iha Mota Ulun Komoro identifika ferik ida lakon. Husi totál pasajeiru na’in 13 ekipa Bombeiros salva de’it ema na’in 12 no ida seidauk identifikadu.
Sekretáriu Estadu Protesaun Sivíl (SEPS) hetan ona dadus pasajeiru bis diresaun Dili-Suai (kamanasa) ne’ebé mout iha Mota Ulun Komoro (19/2) hamutuk 12 no deskonfia ferik ida mak lakon.
Husi totál pasajeiru sira ne’ebé ekipa Bombeiros konsege salva kompostu husi adultu na’in ualu no labarik na’in haat.
“Ha’u orienta ona ekipa Bombeiros kontinua buka nafatin pasajeiru ferik ida ne’ebé lakon ne’e, hahú husi bís laran ne’ebé sei nakonu ho rai-henek ba to’o tasi”, tenik Sekretáriu Estadu Protesaun Sivíl (SEPS), Alexandrino de Araújo, iha knaar fatin, Kaikoli, horisehik.
Bís ne’e tula ema hamutuk na’in 13 inklui kondutór no ajudante, maibé kondisaun ikus pasajeiru hotu-hotu di'ak, ema ida maka ain tohar tanba obriga-aan sai husi bís laran.
Hafoin dezastre ne’e mosu, hetan kedas apoiu husi ekipa Bombeiru, Institutu Jestaun Ekipamentu (IJE), Kompañia Jonize, Polisia Nasionál Timor-Leste (PNTL) Batallaun Orden Publika (BOP) no komunidade sira.
Bís ne’e atu halo viajen husi Dili ba Suai, maibé tanba kondisaun klima la premite entaun to’o iha Air Terjun (Cachoeira) Tiris karreta ne’e deside fila-fali mai Dili. Nune’e, Mota Komoro mós tun makaas ona maibé kondutór obriga-aan tama nafatin.
Ikus mai karreta ne’e avaria iha mota klaran no bís ne’e mós kontinua mout iha mota laran.
Observasaun diáriu ne’e iha fatin akontesimentu, mákina pezadu hanesan buldozer rua no eskavator rua mak dada sai bís ne’e, maibé buldozer ida mós mout iha mota laran tanba korrente makaas.
Tuir sasin, Júlio Barreto, konta tuir katak, bís ne’e husi diresaun Dili atu ba Suai (Kamanasa), sira konsege ultrapasa ona mota Ulun Komoro maibé to’o tiha Air Terjun Tiris sira la konsege ultrapasa tanba mota boot.
Nune’e, karreta ne’e deside fila-fali mai Dili, to’o fali fatin akontesimentu mota ne’e tuun ona, maibé kondutór ne’e obriga aan tama de’it, nune’e to’o iha klaran mákina mate no mota lori karreta ne’e.
“Ha’u tuur iha uma oin. Bís ne’e tuun mai fali ami hakilar dehan para iha ne'ebá ona… maibé sira mai nafatin to’o karreta ne’e mout”, dehan nia, iha fatin akontesimentu, horisehik.
Nia esplika, bainhira bís ne’e mout pasajeiru mane na’in hitu halai sai no komunidade sira ajuda soe tali hodi dada karreta maibé la konsege tanba mota boot ona.
Durante akontesimentu ne’e, katuas ida mak mota lori kuaze metru 50, ne’e mak ninia ain tohar no evakua kedas ba ospitál.
Nia hatutan, mota ne’e la'ós foin mak akontese lori bís ne’e, maibé antes ne’e lori ona ema no karreta balun. Tanba ne’e, Estadu presiza konstrui ona ponte atu labele estraga povu nia vida.
Bainhira seidauk halo ponte karik, di'ak liu taka estrada ne’e provizóriu to’o bailoro ka konstrui ponte hafoin autoriza ema liu ba-mai.
Iha fatin hanesan, Segundu Komandante Bombeiru Dili, Bruno da Costa Magalhães hateten, bainhira akontesimentu bís mout, komunidade sira hamutuk ho ekipa Bombeiru salva uluk ema na’in haat, feto tolu labarik ida, nune’e evakuasaun daruak salva tan ema na'in neen, ikus liu mak ema na'in rua.
Entretantu, Vise-Ministru Obras Publika (MOP), Nicolau Lino Freitas Belo hateten, Governu hahú bandu movimentu transporte ne'ebé hala’o viajen ba parte Norte liuliu Aileu, Manufahi, Kovalima no Ainaru. Labele liu kona mota Komoro ulun tanba kondisaun mota fó risku boot ba pasajeiru nia vida.
Nia hatutan, Governu sei rezolve kondisaun estrada iha Mota Komoro ulun ho kondisaun emerjénsia.
Akontesimentu ne’e mós hetan vizita husi Ministru Transporte no Telekomunikasaun (MTT), José Agostinho da Silva, maibé lakohi komenta kona-ba akontesimentu ne’e.
