Items filtered by date: Kuarta, 18 Fevereiru 2026

DILI:  Prezidente Repúblika, José Ramos Horta   vizita ba pasiénte labarik sira ne’ebé ho moras dengue, hala’o tratamentu saúde, iha Ospital Nasionál Guido Valadares (HNGV) no Sala Internamentu Tasi-Tolu, hodi fó apoia ai-hán ba sira.  

Iha vizita  Xefe Estau ne’e, simu direta husi Diretor Ezekutivu no Prezidente Konsellu Diretivu HNGV, Nuno Vital Soares, hamutuk ho Membru Konsellu Diretiva, iha resintu HNGV Rua Bidau Toko Baru, Dili, loron kuarta feira, (ohin).

Objetivu husi vizita hanesan fahe domin no apoiu aihan (aifuan/sumu) ba pasiente  pediatria (labarik) sira ho moras dengue ne’ebé hala’o hela tratamentu iha Sala internamentu Emerjensia no Pediatria HNGV no Sala Internamentu Tasi-Tolu.

Prezidente Repúblika, José Ramos Horta hatete, ohin hamutuk ho kompaña Agua Leste halo vizita ne’e no fahe ai-fuan no sumu (juice) ba pasiente sira ho moras dengue.

“Iha semana kotuk hau foin mai halo vizita mesak lori ai-fuan no sumu ba  pasiente sira, maibe hau observa no hare pasiente barak, ne’e duni hau fo intrusaun  ba Agua Leste hodi fó apoiu tan be gratuita ba pasiente dengue sira iha ospital,” Deklara PR Horta, liu husi Komunikadu ne’ebé online INDEPENDENTE asesu husi Média-HNGV, Kuarta (18/02).

Xefe Estadu hatuta, moras dengue persiza konsumu bee no sumu barak hodi nune’e bele prevene no kura moras dengue ne’e rasik.

Alende ne’e, Prezidente Repúblika fó apresia ba servisu profisionais saúde sira iha HNGV, maske hasoru pasiente barak no servisu todan, maibe nafatin halo servisu di’ak ho profisional hodi tulun  pasiente sira. 

Iha oportunidade ne’e,  Horta apela ba inan-aman  sira, atu kuidadu ambiente mos iha ida-idak nia hela fatin liu-liu hadok labarik sira husi lixu no bee foer, tanba susuk dengue moris iha fatin  refere.

Iha fatin hanesan,  Diretor Ezekutivu no Prezidente Konsellu Diretivu HNGV, Nuno Vital Soares haktuir,  HNGV fó tratamentu  pasiente moras dengue tuir nia kategoria mak hanesan pasiente ho nivel  moderadu ka severe halo tratamentu iha HNGV no pasiente dengue kma’an iha sala internamentu Tasi-tolu.

Nia informa, hahu husi fulan janeiro to’o  fevereiru 2026 HNGV fó alta ona pasiente ho moras dengue hamutuk 422,   pasiente dengue ne’ebé sei ativu hala’o hela tramentu iha HNGV no sala internamentu Tasi tolu hamutuk 174 no mos pasiente halakon vida  hamutuk 10.

Entertantu, atividade vizita ne’e hala’o durante oras ida ba iha enfermaria ka sala internamentu  pediatria  no emerjensia HNGV no  kontinua vizita ba iha sala internamentu Tasi-Tolu. 

Editór: Aquino Gomes

DILI: Sekretariadu Tékniku Administrasaun Eleitorál (STAE)  introdús ona kartaun biométriku ba eleitór tuan rihun 287,872 no eleitór foun rihun 37, iha rai-laran.

DILI: Médiku espesialista Unidade Onkolojia, Hospitál Nasionál Guido Valadares, husu komunidade atu muda estilu moris no evita fatór risku sira ne’ebé kontribui ba moras kankru, hanesan fuma sigaru, hemu alkol, obesidade no konsumu aihan la saudável.

DILI: Institutu Nasionál Kombate Moras HIV-SIDA kontinua esforsu ba kombate moras HIV-SIDA liu husi edukasaun públika. Iha 16 Fevereiru ne’e, institusaun ne’e servisu hamutuk ho Eskola Tékniku Informátika hodi realiza sensibilizasaun ba estudante sira kona-ba prevensaun transmisaun HIV.