Grupu ida másimu ema na’in 20, hafoin grupu ne’e remata halo devosaun ba Na’in Feto Ramelau, maka grupu seluk bele troka fali.
Diretór Jerál Diresaun Turizmu, José Quintas hateten, Governu hakarak minimiza númeru vizitante tanba fatin ne’e kloot no ki'ik, tanba ne’e bainhira ema barak liu bele hamosu dezastre no impaktu ambientál hanesan rai halai.
“Atu vizita másimu ema 20 de'it tanba kapasidade Na’in Feto Ramelau ne’e ki’ik”, dehan nia, iha Episkopál, Bidau-Lesidere, horisehik.
Governu hamutuk ho Igreja halo ona reuniaun konjuntu hodi diskute kona-ba regra atu vizita fatin turizmu relijiozu Na’in Feto Ramelau, ne’ebé tuir planu sei loke iha loron 7 Outubru 2018.
Iha soru-mutu ne’e partisipa husi Ministru Komesu Indústria, Ministériu Administrasaun Estatál, Ministériu Agrikultura no Peska, Sekretáriu Estadu Meiu Ambiente, Autoridade Munisípiu Ainaru no parte Igreja.
José Quintas hateten, soru-mutu ne’e atu rona ekipa Task Force Ramelau aprezenta ezbosu jestaun ba Igreja no Governu kona-ba regra ne’ebé sei aplika iha Santuáriu Ramelau.
“Ezbosu ne’e atu haree kona-ba regra sinalizasaun no mós fatin atu deskansa”, dehan nia.
Ezbosu ba regra balun ne’ebé aprezenta maka hanesan iha área iha área parajen no fatin deskansa, vizitante sira tenke kria ambiente ne’ebé moos. Nune’e kada ema ida sei selu billete entrada nian $1.
José dehan, regra ne’e halo atu hafanu vizitante sira atu bele respeita fatin ne’e no mós minimiza impaktu ambientál.
Regra hirak ne’e mós bele iha mudansa hafoin implementasaun, nune’e bele haree lakuna balun mosu bele hadi’a di’ak liután.
Iha fatin hanesan, Bispu Dioseze Dili, Don Virgílio do Carmo, agradese tebes ba ekipa Task Force no governu maski difikuldade iha orsamentu maibé ho esforsu atu kria kondisaun mínimu atu bele loke hikas fali iha fulan oin.
Ekipa Task Force ne’ebé harii iha fulan Juñu 2018, atu halo preparativus hodi loke hikas fali Santuáriu Ramelau, iha loron 7 Outubru 2018
Regra peregrinu sira ne’e hatuur hanesan atu kria billete entrada no seguransa atu tau matan, maski kondisaun seidauk preparadu 100% tanba osan laiha.
Iha fatin hanesan, Sekretáriu Estadu Meiu Ambiente (SEMA), Deometrio Amaral hateten, soru-mutu hanesan parte ida oinsá atu rona saida mak ekipa Task Force sira aprezenta kona-ba asaun sira ne’ebé halo husi entidade sira ne’ebé ba vizita.
Nia dehan, governu simu ona rekomendasaun husi ekipa Task Force prosedimentu lubun ida atu bele regulariza ema.
Ba oin sei planu bolu lia na'in sira atu hamosu hikas fali bandu ba ambiente atu ema hotu bele tau lixu iha nia fatin bainhira vizita.
