“Produsaun menus ne’e laos iha Munisipiu Vikeke tomak, iha parte balun laiha. Ami menus iha batar tanba loloos ne’e kuda ona batar iha fulan Novembru laos Dezembru,” dehan diretòr Servisu Agrikultura Munisipiu Vikeke, Carlos Pinto iha nia knar-fatin Vikeke, Kinta (26/01).

Iha tinan kotuk, nia dehan, udan-been laiha no foin lais mak udan tuun maibé, la estavel.

Iha fulan Janeiru tinan ne’e, nia dehan, nia parte fahe batar fini kuaze tonelada 15 maibé ema husi minispiu seluk nia batar han ona maibe iha foin mak atu kuda.

“Ba oin mak udan la’o normal fali ona, espera munisipiu ne’e la susar ona ba batar,” katak nia.

Kona-ba produsaun haré, nia dehan, tinan ne’e barak maibé sei halo hela palnu hodi hadia bee-dalan atu bee bele tama ba to’o natar fatin.

Iha fatin ketak, agrikultór Plasido Mendes hatete, tinan ne’e sira-nia produtu ladun hanesan ho tinan hirak kotuk tanba udan-ben ladun di’ak.

Estraga Bee-dalan

Entretantu, Diretòr Agrikultura Vikeke Carlos Pinto informa, ema deskoñesidu estraga bee-dalan irigasaun nian nune’e halo irigasaun la funsiona ho di’ak.

“Laos tanba udan boot mak irigasaun at maibé, tanba hetan estraga husi ita-nia komunudade balun, sobu hotu mola. Ami buka hela meius par rezolve tiha kestaun ne’e,” dehan Carlos.

Diretór ne’e dehan, tanba mola ba ‘odamatan’ bee-dalan ne’e ema sobu, entaun labele atu hasa’e fali odamatan nune’e bee labele sulin ona ba natar sira.

Carlos dehan, nia parte haruka ona relatoriu ba nasionál no husi parte MAP nasionál tuun ona hodi haree.