ETV Aileu iha Fakuldade haat (4); Informatika, Kontabilidade, Agrikultura no Komersiu.

Entre departamentu hirak ne’e, estudante kuaze iha na’in 30 to’o na’in 60.

“Akontabilidade na’in 36, Informatika na’in 40, Komersiu na’in 28 no Agrikultura na’in 29,” informa Estudante ETV Aileu, Marcelina Pinheiro de Jesus, Sabadu (28/01).

Iha fatin hanesan, estudante klase II Departementu Informatika, Jaimito Pereira Soares hatete, problema ne’ebé estudante sira hasoru iha eskola ne’e mak fasilidade hanesan komputadó.

“Komputador iha sala laran iha rua nolu (20), la to’o, tanba ne’e ami husu ba Ministériu kompetente atu ajuda tan hodi nune’e bele halo pratika ho di’ak,” dehan Jaimito.

Entretantu, Diretór ETV Munisípiu Aileu, Luciano Araújo hatete, dezde tinan 2007 to’o agora sira iha komputador hamutuk 20, rua (2) at ona no 18 mak sei funsiona.

Luciano reforsa, estudante iha eskola refere hamutuk 403, feto na’in 118 no mane na’in 285.

“Ami iha turma rua (2), iha dader ho loraik, dader tama iha tuku 8:00 to’o tuku 12:48, loraik tama iha tuku 1:00 to’o tuku 5:45,” dehan nia.