Edifísiu foun ne’e, governu Timor-Leste hamutuk ho Li TJEN DEVELOPMENT, S.A no GUAN INTERNASIONAL CONTRUCTION ENGINERING CO.LTD lansa tiha ona fatuk dahuluk iha Timor Plaza nia oin, 16 Janeiru liubá.

Reprezentante Rekursu Umanu Kompañia Fortuna FHK, Georgina da Silva  oras ne’e daudauk sira nia parte kria hela programa oinsá mak bele prepara rekursu ba ema rihun atu servisu bainhira edifísiu ne’e remata.

“Fortuna Plaza ne'ebé foin daudauk lansa primeira pedra, presiza traballadór na’in 3.000 atu ba halo servisu iha Plaza foun,” dehan Georgina ba jornalista iha salaun Kanosa Bekora, Kinta (25/01).

Nia dehan, rekursu ne’ebé sira presiza maka, ema akuntasia, finansas, IT, tékniku inklui traballadór ho esperiénsia servisu oin-oin.

Georgina dehan, sira nia parte agradese tebes bele koopera ho Sekretáriu Estadu Polítika Formasaun Profesional Empregu (SEFOPE) atu identifika Timoroan sira ne’ebé tuir formasaun iha sentru formasaun hotu sei hetan oportunidade atu servisu. 

Tuir nia katak, importante liu ema ida atu hetan servisu maka, tenke iha esperensia servisu, mentalidade di’ak, responsabilidade  no dixiplina.

FHK Grupu  agora hahú koopera servisu hamutuk ho Kompañia, LISUN, LIDER, LITA STORE, TOYOTA no kompañia internasionál sira.

Iha fatin hanesan, SEPFOPE, Ilídio Ximenes dehan, governu kontinua kapasita nafatin Timoroan para bele tuir formasaun no remata sira bele ba servisu iha Kompañia Timor Fortuna Central Plaza no kompañia seluk tan.

Ilídio dehan, investimentu Kompañia Timor Fortuna Central Plaza ne’e boot tebes, no presiza duni ema rihun atu ba servisu.

Antes ne’e, Prezidente CCI-TL,Óscar Lima dehan investimentu Kompañia Timor Fortuna Central Plaza sei fó servisu ba Timoroan barak.

Nia hatutan, CCI-TL prontu atu koopera hodi servisu hamutuk dezenvolve ekonomia nasaun no povu Timor-Leste.