Diretór Komunidade Don Bosco Fuiloro, Padre Trans António Pinto dehan, eskola ne’e hahú taka ninia atividade aprendizajen iha inisiu tinan 2012 too 2015.
Nia dehan, hafoin halo esforsu lubuk ida iha tinan 2016 too 2017, maka eskola ne’e foin bele moris hodi hahú fila fali ninia atividade.
Padre Trans dehan, sira nia parte sente triste, bainhira ezisténsia eskola ne’e ‘mout’ durante tinan tolu foin hetan solusaun
“Problema rai ne’e ami tenta rezolve, maibé too agora nia rezultadu seidauk iha. Iha 2015 sira konsege halo fali manutensaun ba eskola ne’e, entaun konsege ativa fali ona too agora,”dehan Amu Trans ba Jornalista sira iha Fuiloro horisehik.
Padre Trans António Pinto hatete, problema ne’ebé sia enfrenta mak rai no iha ema balun ne’ebé servisu la iha kometimentu atu dezenvolve eskola ne’e hodi halo sira taka tinan 3.
Padre ne’e dehan, nia sente agradese tebes, bainhira problema ne’e akontese sira buka solusaun la hetan, too ikus Primeiru Ministru Xanana Gusmão, Atuál Ministru MPIE iha tinan 2014 haruka MAP tun rezolve problema ne’e.
Hataan ba preokupasaun ne’e, Ministru Estanislao Aleixo da Silva hatete,nia lamenta tebes bainhira rona problema ne’e.
“Ha’u hakfodak bainhira rona ida ne’e tanba ne’e mós fó impaktu ba estudante sira ne’ebé aprende iha fatin ne’e,” tenik nia.
Nia dehan, ba oin MAP sei buka koordena atu bele fó apoiu ba ezisténsia eskola ne’e atu fahe nia matenek ba estudante sira.
