Fatin hirak ne’ebé identifikadu poténsia ba problema durante kampaña maka hanesan Munisípiu Dili, Baukau, Vikeke no Lautem.

Husi identifikasaun inisiu ne’ebé polisia hetan, sei halo koordenasaun servisu ho instituisaun FALINTIL-Forsa Defeza Timor-Leste (F-FDTL) hodi bele fó apoiu seguransa ba area kritiku hirak ne’e.

Komandu munisípiu sira halo ona identifikasaun no pasa informasaun kona-ba fatin sira ne’ebé presiza atu koloka forsa defeza nian atu apoiu PNTL iha terrenu durante tempu eleisaun antesipada.

Nune’e, komandu PNTL no F-FDTL trasa ona planu operasaun hodi bele koloka membru sira iha fatin ne’ebé risku mosu violénsia.

“PNTL koordenasaun ho ita-nia forsa armada prontu atu asegura eleisaun antesipada, ba iha kualkér tempu prontu atu halo atuasaun karik problema ruma mosu”, dehan Komandante Jerál PNTL, Komisáriu Júlio Hornai, hafoin enkontru semanál ho Prezidente Repúblika, iha Palásiu Prezidensiál Bairru-Pité horisehik.

Entretantu, Komisáriu Júlio mós apela ba povu Timor tomak, liuliu joven sira atu koopera malu hodi lori nasaun ne’e ba oin. Hatudu ba mundu katak povu iha nasaun ne’e entende di'ak ona saida mak demokrasia no polítika.

Nia esplika, polítiku sira laiha inimigu ba malu. Tanba iha oin sira sempre kaer liman, hamnasa ba malu, sa'e karreta hamutuk no han hamutuk. Ne’e duni, povu sira labele haree ba kritika ne’ebé sira halo ba malu hodi sai ódiu vingansa entre sosiedade sira.

Entretantu, Prezidente Repúblika apresia servisu ne’ebé F-FDTL no PNTL halo hodi kontinua garante estabilidade no pás ba povu durante ne’e. Husu mós atu kontinua kontribui nafatin ba seguransa iha rai-laran nian.