Instituisaun seguransa ne’e lakohi foti risku ba membru sira hodi sai vítima ba harahun bomba restu guerra ne’e.

Komandante Operasaun Nasionál, Superintendente Xefe Henrique da Costa hatete, komandu sei orienta unidade espesiál ba fatin risku ne’ebá, maibé presiza mós iha seguransa ba membru Unidade Espesiál Polisia (UEP), liuliu ekipa destruisaun nia vida.

Ezijénsia ne’ebé komunidade husi Aldeia Bubulita, Suku Makadiki, Postu Administrativu Watulari-Vikeke hato’o ba Komandu Jerál PNTL atu destrui bomba ne’ebé sei ativu hela, tanba fó perigu ba komunidade sira ne’e nia vida.

Maski nune’e, Superintendente Xefe Henrique preokupa katak bainhira dezloka membru sira ne’e ba destrui bomba ne’e rasik, ta'uk membru sira ne’e sai fali vítima.

“Ita lakohi atu destrui sasán ida, ita nia ema sai fali vítima”, tenik nia, Fatuhada-Dili, horisehik.

Tuir nia, to’o agora PNTL seidauk iha materiál foun ba protesaun hodi fornese ba ekipa destruisaun materiál funu nian.

Komandante Operasaun hateten, sasán funu ne’e iha posibilidade atu harahun, maibé kapasidade ekipa nian la sufisiente labele harahun tanba ameasa ema nia vida.

Tanba ne’e, nia dehan, molok dezloka membru sira ba fatin idetifikadu, presiza asegura membru sira nia vida, no mós materiál sira ne’e seidauk kompleta.

Oras ne’e daudaun Polisia Munisípiu Vikeke mós kontinua apela ba komunidade sira iha área Bubulita nian atu labele besik kintál ne’ebé sasán funu nian idetifikadu iha ne’ebá.