Komando Polisia Nasionál Timor-Leste alerta ba Komando PNTL Munisipiu sira atu tau atensaun ba area ne’ebé iha potensia ba konflitu molok tama ba tempu eleisaun parlamentar.
Komandu PNTL deklara katak kuaze iha Munisipiu tomak iha potensia konflitu, maibé ho grau ne’ebé la hanesan, no Munisipiu neen (6) ne’e iha grau ne’ebé boot liu.
Identifikasaun ne’e Komando PNTL halo hodi bele alerta ba Komando PNTL Munisipiu sira atu tau-atensaun masimu ba kestaun seguransa molok prosesu eleisaun parlamentar.
Atu informa asuntu ne’e, Komando Operasaun Nasionál PNTL marka enkontru ho Komandate Operasaun husi Munisipiu sira.
Komadante Operasaun Nasional, Superintendente Xefe Henrique da Costa dehan, enkontru ne’e atu Komando Operasaun sira tenke halo planu ne’ebé feitu hodi tau-matan ba area ne’ebé iha potensia boot ba konflitu.
“Ita identifika ona fatin balun. Ita kontinua update ba Komandate Operasaun hotu hodi toma atensaun masimu,” dehan Henrique ba Jornalista sira iha Kuartel Jeral PNTL, Kaikoli-Dili, Kinta (27/4).
Konflitu, nia dehan, dala-barak mosu husi grupu dezkoñesidu no grupu artemarsial, tan ne’e, nia husu ba Komando PNTL Munisipiu sira atu kuidadu didi’ak.
Ativa 112 Molok Elisaun Parlamentar
Entretantu, kona-ba planu atu ativa hikas númeru 112, Komandante Henrique dehan, númeru ne’e sei ativu iha tempu besik nia laran.
Komadante Operasaun Nasional PNTL, garante katak molok tama elisaun Parlamentar ne’ebe akontese iha fulan Jullu tinan ne’e, liña 112 bele atende ona públiku hodi hato’o keixa ba kazu kazu ne’ebé mosu.
Tuir planu, liña 112 ne’e sei reativa iha fulan Maiu nia laran no bainhira reativa, kada Komandu PNTL iha Munisipiu 13 tenke asesu hotu.
Iha loron hirak liu ba, liña 112 foin mak reativa iha parte Operasaun Nasionál, tanba ne’e Komandu PNTL Ejize ba operadór Timor Telecom, Telemor no Telkomcel atu aselera lalais hodi responde ba Munisipiu 13.
Nia apela ba komunidade sira atu bainhira liña ne’e reativa labele uza hodi lansa informasaun falsu ba Polisia, tanba bainhira idetifika sei kaer hodi halo prosesu investigasaun.
