Ministériu Negósiu Estranjeiru no Kooperasaun (MNEK) kontinua reasaun liu husi koordenasaun ho adidu traballadór sira husi Timor-Leste nian, inklui nasaun sira seluk katak bainhira akontese buat ruma bele fó sai hela avizu.

“Ami nafatin halo liña koordenasaun ho adidu traballadór timoroan iha ne'ebá no mós adidu husi nasaun sira seluk, tanba traballadór rihun 50 resin maka servisu iha ne'ebá husi nasaun hotu-hotu”, dehan Ministru Hernâni Coelho, iha MNEK Praia Kokeiros, horisehik.

Nia esplika, kestaun evakuasaun ne’e normál, maibé seidauk iha indikasaun ruma atu bele halo ida ne’e. Maibé, akompaña nafatin situasaun iha ne'ebá.

Nia hatutan, hanesan kestaun integradu ida ke trata entre governu sira ne’ebé maka tama iha programa enkuadramentu sistema negósiu (IBS) ninian ho Governu Koreia, ne’e duni bainhira iha nesesidade bele halo evakuasaun.

Antes ne’e, média estranjeiru sira fó sai ona katak, Governu Japaun hasai ona alerta hodi halo evakuasaun ba ninia sidadaun sira iha Koreia Súl bainhira laiha dalan solusaun ba problema ne’e.

Entretantu, iha Domingu (23/4), Koreia Norte hasai ona ameasa makaas hasoru Austrália hodi hatún nukleár ida iha Kamberra relasiona ho deklarasaun husi governante nasaun ne’e nian.

Prezensa Forsa EUA iha TL Laiha Relasaun ho Koreia Norte

Entretantu, Ministru Negósiu Estranjeiru no kooperasaun mós esplika katak, informasaun dehan TL hetan ameasadu husi Koreia Norte relasiona ho prezensa aviaun militár US iha Dili, la loos.

Hernâni esplika, aviaun militár US ne’ebé foin daudauk tula forsa sira mai ne’e laiha relasaun ho tensaun husi Koreia Norte, forsa sira mai hetan kooperasaun no asina akordu entre Estadu rua ne’e atu servisu hodi apoiu umanitáriu ba rai ne’e.

“Tensaun iha Koreia Norte ne’e buat ketak ida, laiha relasaun ho vizita militár US mai iha ita nia nasaun ne’e”, tenik nia.

Forsa US ne’ebé mai iha TL husi ekipa forsa enjeñaria nian, ne’ebé sira ninia atividade ba liu umanitária. Forsa balun foin mai ne’e atu substitui fali sira ne'ebé iha ne’e kleur ona.

Hernâni esplika, kooperasaun defeza militár ho US no asina ona akordu. Ne’e duni, atividade sira mai ne’e ho ámbitu kooperasaun defeza militár no mós kobertu husi estatutu forsa konkordata ne’ebé iha.

Forsa sira US sira mai ne’e la lori ekipamentu funu nian, lori maka materiál foun enjeñaria nian hodi troka fali materiál tuan ne’ebé durante sira halo apoiu umanitáriu hadi'a eskola, ponte, estrada no ospitál.