Maria Ressa, iha tinan hotuk (2018) hetan apresiasaun husi Majalah Time nu'udar “Persons of the Year”, antes ne’e hetan kaptura husi autoridade seguransa ho advogadu husi (National Bureau of Investigations (NBI), iha sala redasaun Rappler, loron kuarta lorokraik (13/2).
Kapturasaun ne’e halo bazeia ba karta kapturasaun husi Tribunál Manila, asinatura husi Juis Rainelda H. Estacio-Montesa.
Fundadór Media Online Rappler ne’e akuzadu ho lei sibernétika, tanba nia artigu ida ne’ebé públika iha online Rappler, loron 29 fulan-Maiu 2012.
Artigu (notísia) ne’e ho tema Prokuradór Jerál (Hakim Agung) utiliza karreta ho marka SUV, na’in husi emprejariu kontroversu ida (CJ using SUVs of controversial businessman), ne’ebé públika iha Online Rappler antes Governu Filipina aprova Lei Krime Sibernétiku.
Artigu ne’e konsidera halo ona difamasaun bazeadu ho Lei Sibernétiku liga ba artigu ne’ebé fó sai iha Online Rappler.
Kazu ne’e mosu tanba Lei Sibernétika, vigor ona iha fulan-Setembru 2012, fulan haat depois halo publikasaun.
Tuir lei Sibernétika ne’e, katak ema ne’ebé halo difamasaun liu husi média online ou media sosiál ne’e konsidera krime no sei hetan akuzasaun pena prizaun tinan 12.
Maibé akuzasaun ne’e, tuir Ressa dehan ne’e manobrasaun polítika ida husi Governu Duterte atu hamate média. Kalúnia-sibernétika nu'udar kazu foun hodi halo akuzasaun oioin hasoru jornalista senior Filipina ne’e.
Entretantu, organizasaun Direitu Humanus Amnesty International no Komisaun Protesaun Jornalistas (Komisi Perlindungan Jurnalis-CJP) kondena makaas medidas Governu Filipina nu'udar asaun klaramente iha motivasaun polítiku. Maibé Presidente Rodrigo Duterte hatete, pasu ne’e hanesan medida normál hodi responde reklamasaun públiku.
Aliansi Jurnalis Independen (AJI) husu ba Governu Filipina atu respeita demokrasia no fó protesaun ba liberdade imprensa ho maneiras hapara intimidasaun nomos akuzasaun hasoru Maria Ressa.
AJI hato'o sira nia solidariedade no apoiu ba Maria Ressa, Rappler, no jornalista hotu ne’ebé hamaha-an iha organizasaun jornalista the National Union of of the Philippines (NUJP).
Timor-Leste Press Union (TLPU) mós hatoo sira nia solidariedade hodi kondena makaas medida kapturasaun jornalista senior Maria Ressa ne’e.
TLPU hato'o karta petisaun ba Governu Filipina liu husi nia embaixada iha Timor-Leste, atu fó liberta totál ba Maria Ressa husi akuzasaun no sansaun multa ne’ebé kuaze 1,400 Poundsterling.
Husu ba Governu Durtete atu respeita demokrasia, liberdade imprensa no liberdade expresaun.
Hafoin hetan livre kondisionál Ressa hatete “saida mak ita haree ne’e hamate demokrasia,”. Ressa duun Governu halo abuzu de poder no uza lei nudar kilat hodi hamate ema ne’ebé kontra.
Maria Ressa hamutuk ho jornalista na’in tolu estabelese Media Online Rappler ne’e iha tinan 2012.
Rappler koñesidu iha Filipina ho nia artigu sira ne’ebé kro'at no investigativu. Rappler nu'udar média Online ida husi média online sira seluk sempre nakloke halo kritika makaas polítika Presidente Durtete, inklui polítika Durtete kombate narkótika, ne’ebé hamate ona ema rihun.
Iha fulan-Dezembru, Media Online ne’e mos publika notisia ida kona-ba Presidente Duterte konfesa halo relasaun sexsual ho kriada ida (pembantu rumah tangga).
Presidente Durtete rekuza notísia ne’e “Notísia Falsu” no bandu jornalista Rappler halo kobertura ba nia atividade ofisial.
Pior liu iha tinan kotuk, Governu Durtete hasai lisensa Media Online nian.
Apoiantes liberdade imprensa observa katak politika Governu Durtete ne’e nu'udar esforsu ida hodi ameasa organizasaun jornalista ne’ebé krítiku, atu nonook.
Liberdade Imprensa iha Filipina tuun ba ranking neen (6) tinan kotuk bazeia ba Reporters Without Borders husi 133 ke 180. Reporters Without Borders nota katak Governu Durtete halo intimidasaun no hapara média sira ne’ebé krítiku.
Durtete ameasa média krítiku sira seluk, inklui jornál Philippine Daily Inquirer no apresentador ABS-CBN. Durtete halo ameasa hodi duni sai Na’in ba Media sira ne’ebé deskonfia la selu taxa ou blokeia aplikasaun média sira.
Iha Timor-Leste, Governu lidera husi Primeiru Ministru Taur Matan Ruak liu husi Ministériu Transporte no Komunikasaun halo ona diskusaun atu kria lei sibernétika ne’e, tanba seidauk iha lei ida hodi regula média online, no média sosiál sira seluk. (Situs Online Rappler/Kompas/Tempo).
