Partidu Politiku ida ne’ebé hanaran Kmanek Habura Unidade Timor Oan (Khunto) ne’ebé ofisialmente rejistu nu’udar Partidu Politiku iha tinan 2011, la presiza tempu naruk atu bele hada’u kadeira iha Parlamentu Nasionál.
Ho baze grupu arte-ritual Klibur Oan Rai Klaran (KORK), Khunto ne’ebé lidera husi José dos Santos Naimori Bukar ho nia feen Armanda Berta dos Santos konsege kompete ho partidu sira ne’ebé eziste kleur ona hanesan Partidu Demokratiku ka partidu ne’ebé lidera husi veteranu boot ida, Taur Matan Ruak.
Iha ninia partisipasaun dahuluk iha eleisaun parlamentar 2012, Khunto ne’ebé hetan votus ho pursentajen 2.97% la konsege tama PN. Maibé iha eleisaun tuir mai iha 2017, Khunto konsege hetan votus ho pursentajen 6.43% hodi hada’u kadeira 6 iha PN.
Iha eleisaun antesipada iha 2018, Khunto hamutuk ho CNRT no PLP, harii bloku Aliansa Mudansa ba Progresu (AMP) ne’ebé konsege lori sira ba kaer ukun.
Prezidente Partidu Khunto, Armanda Berta, hetan fiar hodi asume kargu nu’udar Ministra Solidariedade Sosial no Inkluzaun.
Hafoin CNRT retira an husi governu no Fretilin tama hodi tonka, kareira Berta hahú sa’e liu tan. Armanda hetan fiar hodi asume kargu nu’udar Vise Primeira Ministra.
La satisfas ho kargu ne’e, Armadan ho apoiu masimu husi nia laen, Naimori no partidu Khunto, koko atu haksoit ba palasiu Prezidente Repúblika.
Berta ho brani no fiar an deklara kandidata an ba Prezidente Repúblika periodu 2022-2027 hodi kompete ho kandidatu PR na’in 15 seluk.
Biografia
Nu’udar lider ida, Armanda Berta laiha biografia ne’ebé klaru no kompletu hanesan lider sira seluk.
Maske nune’e, jornal INDEPENDENTE konsege asesu biografia badak kona-ba Berta husi ninia ekipa susesu.
Armanda Berta, moris iha Maloa, Díli, iha 11 Outubru 1974.
Iha tinan 1975 bainhira Indonezia hahú ninia okupasaun, Berta ho nia familia sira halai ba ailaran no tuun fali ba villa iha munisipiu Ainaro iha tinan 1980.
Iha villa, Armanda hahú ninia estudu no konsege remata nivel Sekundaria iha munisipiu Ainaro.
Nu’udar feto Timor-Leste, Berta mós envolve iha atividade klandestina. Nia servisu hamutuk ho ema klandestina ho naran kodigu ‘Labok’. Nia mós servisu hanesan apelu ho kodigu Inan Halibur Rai Klaran (IHRK). Iha tinan 1994, nia sai nu’udar membru klandestina iha organizasaun FITUN hamutuk ho nia laen, Naimori, iha area Aileu, Ainaro, Same no Suai.
Alende ne'e Subtitui hanesan mós deputada Alianca Demokrata (AD) iha tinan 2011.
Iha tempu ukun an, Berta kontinua nia estudu iha Universidade da Paz no kontinua nia mastradu iha Universitas Teknologi Surabaya (UTS).
Berta remata ninia nível lisensiatura iha área espesializasaun jestaun iha tinan 2012 no akaba Mestradu iha área espesializasaun jestaun governativa iha tinan 2015.
Ho nivel edukasaun ne’ebé nia iha no esperensia nu’udar membru governu, Berta hakat tan pasu ida atu sai Xefe Estadu. Nu’udar feto ida, nia sei kompete ho ninia feto-maluk na’in tolu seluk no sei kompete mós ho kandidatu mane na’in 12 hodi bele hetan konfiansa husi povu atu tuur iha kadeira númeru 1 iha Timor-Leste.
