Sentimentu tauk ne’ebé book nia hahú lakon bainhira illas ne’ebé nia hein mosu mai husi nakukun laran. La hatudu oin-midar, hakat liu de’it ba uma-laran.

Ho sentimentu ne’ebé kahur-malu, Leopoldina Ribeiro, hasee nia laen, Rosa Rafael.

“Agora ne’e ema hana-malu barak,” dehan Leopoldina hodi fó hanoin ba nia kaben ne’ebé fila kalan tanba serbisu.

La hatene tanba sa, lia-fuan ne’e provoka fali sentimentu emosaun husi Rafael. Ho brutu uitoan, nia dada feen ba li’ur ho intensaun atu husik nia feen iha li’ur de’it.

Asaun Rafael ne’e provoka Leopoldina nia emosaun no nia foti fatuk hodi tuda Rafael nia kotuk-laran. Reasaun husi Leopoldina ne’e, halo Rafale nervozu liu tan, nia fila mai hodi baku nia feen no tuda nia ulun to’o monu ba rai.

Ho hahalok ne’e, Rafael tenke ba hatan iha Tribunal Distrital Dili (TDD). Nune’e, hafoin liu husi prosesu julgamentu, tribunal deside hodi aplika pena prizaun tinan rua (2) no pena suspensaun ba Rafael no kondena selu taxa $40 ba tribunal. Pena suspensaun ne’e obriga atu kada fulan Rafael tenke aprezenta an iha TDD to’o tinan rua.

Tribunal deside mós atu fó prazu loron 15 ba Rafael ho nia feen atu mai Tribunál hodi husu deskulpa ba públiku.