Reprezentante Amante futeból Timor Leste, João Feliciano husu liuliu ba Sekretáriu Estadu Juventude no Desportu (SEJD) atu halo kontinuasaun ba reuniaun ne’ebé klube husi Liga Futeból Amadora (LFA) iha semana hirak liu ba relasiona ho sansaun ne’ebé fó sai husi AFC ba jogadór ekipa nasionál Timor-Leste iha falsifikasaun dokumentu.
“Tempu ona para ita hamutuk, hodi soe hamutuk ideia, tuur hamutuk iha meza ida atu bele hare futeból ba futuru ne’ebé di’ak liu,” João dehan ba jornalista sira, iha Balidi Dili foin lalais ne'e.
Amante ninia pozisaun hakarak reforma estrutura FFTL liu husi dalan kongresu para fó solusaun ba problema hirak ne’e. Tanba amante mós rona informasaun katak FFTL atu hala’o kongresu iha fulan Abríl oin mai, maibé atu halo kongresu liu husi dalan oinsá. Tanba durante tinan rua ba kotuk estrutura FFTL sira la halo kongresu.
Amante Futeból husu FFTL tenke nakloke an ba entidade hot-hotu no klube sira ne’ebé rejista ona iha notariadu hodi kompete iha LFA, tanba ne’e kongresista sira mai husi klube ne’ebé agora eziste iha kompetisaun LFA no mós hetan ona legalidade iha notariadu.
Iha konstituisaun Repúblika Demokrátika Timor-Leste (RDTL) foo dalan ba organizasaun ou grupu ne’ebé moris legál iha nasaun ne’e no klube ne’ebé prienxe rekizitu sai hanesan membru federasaun futeból iha direitu para atu partisipa iha kongresu.
João dehan, Sekretáriu Jerál Federasaun Futeból Timor-Leste, Amândio de Araújo hetan sansaun tama prizaun durante tinan tolu, tanba ne’e nia la iha direitu atu koalia kona ba futeból, ne’e duni nia só bele hataan de’it sansaun ne’ebé nia halo.
Iha fatin ketak, Sekretáriu Estadu Juventude Desportu (SEJD), Leovigildo da Costa Hornay ko'alia, atu halo enkontru ba parte tolu (3) mak hanesan, Federasaun Futeból Timor-Leste (FFTL) ho ninia estrutura tomak hahú husi Prezidente, Sekretáriu Jerál no Vise sira, inklui asosiasaun munisípiu, prezidente ezekutivu Liga Futeból Amadora, klube rua nulu resin ida (21) hamutuk ho observadór sira.
Leovigildo espera katak, enkontru ne’e bele la’o ho di’ak no hot-hotu mai ko'alia ho matenek, koalia ho ulun malirin, mai ho espíritu patriotizmu, mai ho espíritu nasionalizmu, mai argumenta no hanoin sira ne’e para atu buka solusaun ba futeból Timor.
Governu hakarak fasilita sira atu halo enkontru ne’e, maibé depende ba LFA ho klube foun sira, depois atu hare medida solusaun saida mak ideal ba iha klubu hirak ne’e, tanba prosesu tenke la’o iha époka ida ne’e.
