Liu husi ninia kampaña eleitorál iha Baukau, Sekretáriu Jerál partidu FRETILIN, Mari Alkatiri hateten, vota ba FRETILIN manan atu Xanana mós bele manan. Bainhira FRETILIN maka la manan, Xanana mós la manan.

“FRETILIN tenke manan atu ami besi tua sira 1974-1975 bele manan. FRETILIN tenke manan atu Xanana bele manan. Se FRETILIN maka la manan, Xanana mós la manan”, tenik nia, iha kampaña komísiu iha Aeroportu Baukau, Tersa (11/7).

Nia esplika, Xanana atu manan bainhira nia servisu hamutuk ho FRETILIN no sasán sira sei la’o di’ak. Tanba ne’e, FRETILIN tenke manan atu Xanana bele halo servisu sasán la’o di’ak ho konkretiza.

Alkatiri dehan, saida maka sala FRETILIN sei hadi'a. Loloos la'ós tanba estrada maka kualidade ladún di’ak, la'ós tanba infraestrutura la’o la loos, la'ós tanba saúde la’o la loos sala, maibé ne’e polítika. Governu laiha polítika ida atu bele implementa no hala’o dezenvolvimentu la’o ba oin.

Nia dehan, governu iha planu estratéjia dezenvolvimentu nasionál maibé nunka implementa planu ne’e, tanba Xanana konfia sira, sira fila kung-fu fali Xanana.

Entretantu, iha kampaña Partidu Libertasaun Populár (PLP), Prezidente partidu, Taur Matan Ruak hateten, iha ema balun aproveita de'it lider funu na’in Xanana Gusmão.

“Sira ne'ebé hale'u nia (Xanana), sira ne’e só buka aproveita de’it”, tenik nia, iha Kampaña komísiu, iha Postu Administrativu Laklubar-Manatutu, Tersa (11/7).

Nia dehan, ema sira ne’e la hatene hanesan uluk foti maun Xanana nia naran iha ai-laran, maibé ema sira ne’e hatún maun Xanana nia oin no naran.

CNRT Manan Povu Manan

Hataan ba kestaun sira ne’e hotu, Prezidente Partidu CNRT, Kay Rala Xanana Gusmão, liu husi nia diskursu iha komísiu kampaña eleitorál iha Suku Maumeta, Likisá, foin lalais ne’e hateten, bainhira partidu CNRT manan iha eleisaun, la'ós partidu mak manan atu kaer ukun, maibé povu mak manan.

Nia hatutan, partidu CNRT nia hanoin la'ós atu hadau ukun, maibé partidu CNRT iha ona kompromisu atu halo mak garante pás no estabilidade no dezenvolvimentu nasionál.

Ne’e duni, Xanana husu ba militante no simpatizante sira katak, CNRT fiar-aan sei manan iha eleisaun. Tanba ne’e, bainhira manan militante sira labele halo problema.

“Kuandu ita manan militante CNRT la'ós atu ba prova tun-sa'e, maibé tuur hakmatek atu halo servisu, tanba tempu agora tempu servisu, maibé la'ós tempu funu”, katak nia.

Nia hatete, bainhira partidu CNRT manan sei lori governu hakbesik ba povu tanba ne’e kompromisu partidu CNRT nian no sei kontinua saida mak iha ona.