Kampaña ba loron dahuluk iha kampu futebol Suai nian, Xanana dehan ema barak kritikas CNRT dehan ukun tinan 10 ona maibé la halo buat ida. Eis Komandante Gerileiru ne’e simu kritikas sira ne’e maibé nia afirma katak rai sira seluk ukun tinan 40 ou 50 nia laran maibé Timor-Leste nia dezenvolvimentu di’ak liu fali sira.
“Vota ba CNRT hanesan vota ba nasaun ne’e nia futuru, tanba CNRT mak bele garante unidade nasional, dezenvolvimentu, paz no estabilidade,”dehan Xanana
Xanana konversa nafatin nia militante katak CNRT uluk halibur Timoroan ba ukun rasik an, agora CNRT halibur tan Timoroan ba dezenvolvimentu no ba moris di’ak.
“Ha’u mesak ha’u labele, tanba ne ha’u husu ba imi nia poiu mai hamutuk ho CNRT ita sei halo buat rumaiha tinan lima ne’e nia laran,”tenik Xanana
Iha fatin hanesan, kordenador Partidu CNRT Munisipiu Covalima, Saul Amaral fiar katak partido CNRT sei manan maioria iha Covalima.
“Ami Cavalima sei vota ba CNRT, laiha tan dalan seluk atu nune’e bele lori Maun Boot Xanana ba ukun mesak hodi hadia povu no nasaun ne’e nia moris,”hateten Saul.
Tuir observasaun diario ne’e, kampaña ba loron dahuluk hetan partisipasaun maximu husi militante no simpatizante sira. Aliende ne’e, hetan mós partisipasaun maximu husi lider partido CNRT sira.
