“Ha’u bele dehan FRETILIN manan, FRETILIN sai governu sei loke fila fali inskrisaun ba veteranu sira,”dehan Dr. Alkatiri. iha kampanha abertura FRETILIN nian iha Municipiu Likisa (20062017).

Veteranu balun simu ona tinan rua tinan tolu, balun seidauk simu, Alkatiri dehan, Governu sei fó kompensasaun ba sira ne’ebé mak la simu.

“Veteranu sira ne’ebé mak seidauk simu ne’e tenki iha kompensasaun, balun simu ona tinan rua tinan tolu, balun seidauk simu agora hadia atu simu tenki hatene atu halo kompensasaun ba sira,” dehan Dr. Mari Alkatiri.

Iha veteranu balun ne’ebé mak depois independensia mak seidauk hetan sira nia direitu ba pensoens maibe sira fila ona ba manan maromak nia kadunan Santo, nia familia sira iha direitu simu pensaun, ne’emak politika FRETILIN nian ba Veteranus.

Aliende ne’e, Dr. Mari Alkatiri mós promete, FRETILIN sei kria fundu de pensoéns ida ba veteranu, idozus invalidus no bolsa da maé, nune’e bele garante sustentablidade pensaun ba veteranu, ferik katuas no bolsa da maé.

Alkatiri hatete, politika FRETILIN nian atu kria fundu ida ho naran fundu de pensoens. Osan atu kapitaliza ka investe ba fundu ida ne’e mai duni husi fundu minarai, depois mobliza komonidade internasional atu finansia fundu ida ne’e.

Ho politika ida ne’e, tuir Alkatiri katak bele garante ona sustentablidade pensaun ba veteranu sira, ferik katuas sira no bolsa da maé.

Tenki kria fundu de pensoens tanba se governu kontinua selu pensaun veteranu sira ho osan fundu minarai , aban bainrua minarai maran osan mos laiha atu selu veteranu sira , tanba ne’emak fundu de pensoens importante tebes.

 “Ha’u la promote, maibe kuandu ha’u ko’alia tanba ha’u halo kontas ona, fundu ne’e sei garante sustentablidade politika subsidiu ba veteranus, ferik katuas no bolsa da maé,” dehan Alkatiri.