Iha kompromisu Polítika, Prezidente Partidu Demokrátiku, Mariano Asanami Sabino ba militante no simpatizante hateten, PD hamriik para atu realiza no implementa duni valór ne’ebé funu na'in sira deklara ona hodi sai lisan no tradisaun ida ba ukun nian.
“PD hamriik iha funu na'in FALINTIL sira nia ain fatin atu hahú funu ba dezenvolvimentu no lori ema hotu atu sai demokrátiku no republikanu”, dehan nia iha komísiu kampaña polítika iha munisípiu Aileu, Domingu (09/07).
Assanami dehan, nu’udar jerasaun foun sente orgullu tanba bele sai joven kontinuadór ba luta ne’ebé mak eroi sira husik hela ba nasaun ne’e.
Tanba ne’e, nia dehan, PD nia manan orgullu ba FRETILIN no CNRT no mós ba asuwa'in sira ne’ebé mate ona ba rai ne’e.
"Ha’u orgullu tebes ba eroi funu na'in sira liu-liu ba Francisco Xavier no Nicolao Lobato no mós funu na'in hotu tanba alerta ona hodi hahú funu iha Aileu”, dehan nia.
Hakarak valoriza luta sira ne’e, nia afirma, PD hamriik hodi kontinua kaer prinsípiu no lisan ne’ebé mak funu nain sira husik hela iha Aileu ho mehi bo’ot hakarak TL bele sai nasaun Repúblika demokrátiku.
Loke Banku ba Veteranu
Prezidente Partidu Demokrátiku (PD), kompromete loke banku ba veteranu sira iha Timor-Leste laran tomak hodi dignifika luta na'in sira, nia luta iha prosesu ba libertasaun, bainhira povu fiar no fó votu ba Partidu Demokrátiku (PD), iha loron 22, fulan Julhu hodi ukun.
Prezidente Partidu Demokrátiku (PD), Mariano Assanami Sabino dehan, dalan ba ukun rasik-an liu husi prosesu ne'ebé naruk, ema barak terus no mate. Maibé iha luta ida ne’e sira la halo komprimisu ba nia estadu kuadu liberta-an sei selu luta nain sira nia kolen. Maibe pensaun ne’ebe mak governu fo atu dignifika sira hodi bele hadi'a ekonomia uma laran.
Nia dehan, iha tempu rezisténsia, luta na'in sira nia vida dedika hotu ba luta. Tanba ne’e laiha tempu sira atu asesu ba edukasaun iha independénsia ne’e. Veteranu s presiza hadi'a moris liu husi subsídiu ka loke banku ba sira, atu nune'e sira bele haruka sira nia oan ba eskola.
"Ita hakarak loke banku ba veteranu sira atu nune’e bele rai osan atu nune’e nia funan bele uza hodi selu oan ba eskola no halo buat seluk,” hatete Prezidente PD, Mariano Assanami Sabino.
Banku banku veteranu ne'ebé PD planeia ona atu implementa ne’e, veteranu sira atu rai nia osan hodi kada fulan-fulan, sira bele simu fali ninian nune’e mós kuandu sira mate nia oan no bei-oan sira bele kontinua simu atu sira bele hatene no dignidade luta nia aman sira halo ba rai ne’e.
“Ita la iha tavar menavar kona ba kompensasaun veteranu. Tanba ne’e Pervertidu Demokrátiku sei dignidade sira iha tempu ne'ebé de'it, kuandu ita harii banku veteranu sira rai nia osan ne’e, sei ba nia oan to’o bei oan sira bele asesu nafatin,” dehan Assanami.
Nia hatutan, politika no programa fo pensaun ba Veteranu sira ne’e mai husi polítika PD nian, tanba ne’e atu garantia nafatin programa ne’e nia sustentabilidade so úniku PD mak bele realiza.
“Husu ba kompañeru hotu la'ós ne'ebé mak iha PD no ba sira ne'ebé mak iha partidu FRETILIN, CNRT, ASDT no partidu seluk atu bele vota ba PD atu bele realiza programa ne'ebé mak PD planeia ona”, hatete Assanami.
