Tuir Reprezentante Rezidente UNDP iha Timor-Leste, Munkhtuya Altangerel, hatete, apoiu nee hanesan parte ida husi akordu neebé UNDP ho CNE halo, nunee hodi bele garante  povu bele asesu ba informasaun, neebé estabelese plataforma ba informasaun dijital no produsaun informasaun, edukasaun no komunikasaun, nunee sei inklui mós formasaun kona-ba meius prevensaun Covid-19 ba pesoal CNE durante iha eleisaun.

“Partisipasaun demokrasia ne’e ko’alia mós kona-ba inkluzaun, tanba ne’e importante iha espasu ba partisipasaun no fiar katak akordu ida ne’e sei apoiu CNE atu kria kondisaun ba membru sosiadade oioin atu bele partisipa iha eleisaun prezidensiál,”dehan nia iha salaun CNE, Kolmera, sesta horseik (04/02).

Nia hatutan, projetu UNDP nian ne'ebé bolu Covid Resilient Elections hetan finansiamentu husi Governu Japaun tanba parseria ne'e espesifiku tebes atu apoiu orgaun eleitoral sira hanesan CNE, hodi bele hala'o eleisaun iha tempu pandemia ne'e ho seguru no susesu.

"Ami espera katak ami bele ajuda iha siklu eleitoral ne'e tomak hanesan ita bele fo apoiu eleisaun prezidensial depois eleisaun parlamentar no mós suku tanba apoiu ne'e sistematiku kompresivu tebes ba apoiu ne'ebé UNDP fornese ba Governu Timor-Leste no orgaun eitoral sira,”tenik nia.

Enkuantu, orsamentu ne'ebé UNDP apoiu ne'e, kobre hotu ba iha konstrusaun ka projetu tomak ne'ebé halo hodi edifisiu CNE no STAE iha munisipiu tolu hanesan Aileu, Baukau no Kovalima.

Iha fatin hanesan, Prezidente CNE, José da Costa Belo, hatete, nia parte orgullu ho apoiu neebé UNDP oferese, ida nee diak tebes ba orgaun eleitoral atu bele kompleta preparasaun liu-liu realiza eleisaun ne'e bele lao ho diak no iha informasaun ne'ebé diak ba soseidade sira ka eleitor sira neebé partisipa iha eleisaun prezidensial ho hakmatek.

Asistente Editor: Saturnina da Costa