Tan ne’e, tempu to’o ona ba jerasaun foun atu kaer ukun hodi konsentra ba dezenvolvimentu nasionál.

Kandidatu Prezidente Repúblika (PR) númeru 16, Mariano Assanami Sabino Lopes hatete, aman sira nia otas tuan ba daudaun maske nune’e sira labele lakon esperansa ba futuru nasaun tanba oan sira ne’ebé uluk la’o ho sira ohin to’o ona nia otas atu hatutan todan ne’ebé iha hela sira-nia kabas.

Nia dehan, tempu ona ba jerasaun foun sira hamutuk hakotu aman sira nia konflitu liu husi eleisaun, bainhira vota bebeik sira mak konflitu kontinua la’o, dezenvolvimentu hakdasak nafatin.

Kandidatu PR ne’e dehan, labarik no joven sira oras ne’e presiza moris di’ak, asesu ba edukasaun ne’ebé kualidade, asesu kampu servisu ne’ebé dignu ho salariu ne’ebé natoon atu nune’e sira bele hadia sira-nia moris ba oin.

“Imi tenke hamriik hanesan aswa’in Timorense, luta hodi nasaun ne’e ba oin kompete ho nasaun sira seluk, ita labele asiste nafatin konflitu antigu ne’ebé hamosu impase politiku, ekonomia hakdasak, tanba ne’e ha’u husu deskulpa ba aman sira atu hapara ona trata-malu iha palku leten, tanba joven sira-nia futuru ne’e importante,” dehan nia Assanami liu husi diskursu politika, iha kampaña eleitoral, iha kampu futebol Vikeke, Kuarta (09/03).

Tuir nia, aman sira hanesan Maun Boot Xanana, José Ramos Horta, Mari Alkatiri, Lere, no seluk tan, nia luta mak ohin loron rai ne’e hetan independensia, maibé ukun aan la’os remata to’o iha, liberdade ne’e tenke oferese moris di’ak ba joven sira.

Bainhira joven sira asesu ona kampu servisu, nia dehan, sira bele goza moris, livre ba eskola, hadia fiziku, mental no spiritual, sei fasil tebes ba TL atu kompete ho nasaun sira seluk tanba iha ona kondisaun.

“Ha’u hakarak moris di’ak ba joven sira, inan-aman no kiik-oan sira, tanba ne’e ha’u deside hakarak sai Prezidente Repúblika atu garantia bem estar povu nian,” deklara Assanami.

Tan ne’e, nia husu ba foinsa’e no inan-aman sira atu tenke matenek ona haree situasaun tanba tinan 20 ona labele moris nafatin iha kadeia konflitu lider sira nian.

Nia dehan, vota ba kandidatu Assanami sai Xefe Estadu hodi promove politika jeral ne’ebé bele garantia bem estar povu no nasaun nian.