Primeiru Ministru, Mari Alkatiri hatete, seidauk haree orsamentu maibé vota kontra ona. Ne’e ida-idak nia polítika, maibé presiza haree no estuda uluk foin vota kontra bainhira aprezenta Orsamentu Retifikativu iha Parlamentu Nasionál.

Xefe Governu sente konfuzaun konfuzaun no husu ba partidu opozisaun sira tenke estuda uluk programa mak vota kontra.

“Ne’e mak halo ha'u bingung fali, seidauk haree orsamentu, maibé vota kontra uluk ona,” dehan PM Alkatiri, iha Aeroportu Nicolau Lobato Komoro-Dili, horisehik.

Nia hatutan, bainhira haree uluk mak fó vota kontra, sera-ké programa ne’e fó vantajen ba povu ka Lae? prinsipalmente vantajen ne’e ba povu ho nasaun la'ós ba partidu.

Kona-ba aprezentasaun Orsamentu Retifikativu, tuir planu VII Governu nian sei aprezenta ba Parlamentu Nasionál iha loron 9 Novembru.

Nia dehan, Orsamentu Retifikativu ne’e mai husi VI Governu Konstitusionál tuir programa VI governu nian. Daudaun ne’e orsamentu ba retifikativu hela millaun $200 resin mak daudaun ne’e iha.

Nia dehan, objetivu atu ukun nasaun ne’e atu ukun ba povu, la'ós ukun ida-idak nia aan rasik. Tanba ne’e, presiza hatene didi'ak oinsá mak ukun nasaun ne’e.

Nune’e, Primeiru Ministru mós garantia katak VII Governu ne’e dura to’o tinan lima, karik mosu eleisaun antesipada mak governu ne’e bele hela.

“Ha'u garante duni katak governu sei dura,” tenik Alkatiri.

Alende ne’e Xefe Governu ne’e mós promete katak governu sei la monu iha tempu badak nia laran, maibé governu ne’e sei ukun to’o tinan lima nia laran no ukun to’o eleisaun antesipada.

Antes ne’e, liu husi konferénsia nasionál CNRT nian, Prezidente PLP, Taur Matan Ruak hateten, situasaun di'ak liu ba Timor-Leste ohin loron maka la presiza iha eleisaun antesipada, maibé bainhira programa governu nian la pasa dala rua bele entrega ba partidu segundu mais votadu.

Tuir nia, bloku ne’ebé partidu opozisaun sira forma liu husi Aliansa Maioria Parlamentár (AMP) nu’udar alternativa di'ak liu hodi bele garante nafatin estabilidade governativa.