Xefe Governu la preokupa ba situasaun polítika, tanba konfiansa boot ba povu tomak. Durante fulan hirak nian laran hatudu ona katak, povu hotu-hotu hakmatek nia fatin, tanba ida-idak hala’o nia servisu.

Maski nune’e, PM Alkatiri preokupa fali mak lider polítiku sira, tanba sira mak durante kaer la metin.

“Maturidade povu nian metin ba beibeik tanba sira hein hela benefísiu independénsia nian bainhira mak to’o ba sira”, dehan nia, iha bainhira partisipa Kongresu 12 Novembru, iha Sentru Konvensaun Dili (SKD), horisehik.

Nia hatutan, VII Governu ukun rai Timor-Leste ne’e la'ós problema ho povu, maibé problema ho polítiku sira. Dala barak ho intensaun atu serbí povu bainhira loos mak ukun povu ho di'ak.

Nune’e, Xefe Governu ne’e deklara katak atu ukun rai ne’e hodi serbí ba povu ne’e, la'ós ukun povu hodi obriga ba povu hodi tuir ida-idak nia hakarak.

Ne’e duni, nu'udar Primeiru Ministru tenke buka dalan hodi hetan konsensu ida ho nivel polítika sira hodi hetan dalan ida ne’ebé loos atu serbí povu. Maibé, konkorda katak lider jerasaun 1974 nian tenke hamutuk hori uluk kedas.

“Maibé ha'u hakarak hatete de'it prontu atu ko'alia, bainhira hotu-hotu prontu atu simu saida de'it mak povu nian hakarak”, haktuir PM

Nu’udar Primeiru Ministru hein de'it bainhira mak simu malu entre polítika sira tane liman ba malu, kona-ba Deputadu sira iha Parlamentu Nasionál nia tradisaun mak hanesan ne’e. Maibé, lider polítika sira mak tenke buka dalan iha entendementu ruma.