Gil hatete, to’o ohin loron governu ne’ebé lider husi Primeiru Ministru Taur Matan Ruak la halo buat ida ba rai ne’e.
“Fiu metru 100 mós ami la dada, estrada metru 10 de’it mós ami la halo inklui ha’u-ata ko’alia ne’e. Tanba ha’u tenke onestu ba povu. Sai líder atu servi, la’ós atu subar nia hahalok aat, maibé tenke hatudu, tanba la hatudu, povu mak sala de’it, ninia mak loos hela de’it,” dehan Gil durante kampaña kandidatu Prezidente Repúblika númeru 14, José Ramos Horta iha kampu futebol Ladi, Postu Administrativu Suai, Munisipiu Kovalima, Tersa (08/03).
Nia dehan, povu intrega nia votus ba ukun-nain atu ukun hodi lori nasaun ba oin la’os vota atu ba tuur de’it no povu mak tata liman.
“Ohin ami justifika ba povu ho sesta bazika, ami justifika ba povu ho uma kbiit Laek sanolu iha suku ida, ami moe laiha, labele taka povu nia matan, ha’u membru governu, maibé ha’u moe atu ko’alia,” nia dehan.
Nia dehan, ema barak lamenta tanba saida mak CNRT fó opsaun ba José Ramos Horta bainhira eleitu ba Prezidente Repúblika atu dizolve parlamentu, tanba kultura ukun la normal ona no kadik tiha ona, tanba ne’e tenke hadia.
“2022 se kandidatu Prezidente Repúblika José Ramos Horta konsege manan sei dizolve parlamentu, maibé la’ós tuur-tuur ba sobu de’it, tanba nia ema matenek, sei konsulta partidu politiku ne’ebé asentu iha parlamentu inklui partidu CNRT, atu nunee tinan ida halo eleisaun dala ida de’it,” katak nia.
Husu Ezonera SEAK Oan Soru
Iha fatin ketak, Vise Prezidente Komisaun Polítika Nasionál (CPN) Partidu Libertasaun Popular (PLP), Antonio Freitas, ezije ba Primeiru Ministru Taur Matan Ruak, atu ezonera Sekretariu Estadu Asuntus Kombatente Libertasaun Nasionál, Gil da Costa ‘Oan Soru’.
Tuir nia, PM tenke foti desizaun tanba Oan Soru hatudu atetude indisiplina no maupagadór.
“Oan Soru, ha’u’ husu ba ita-boot, se bele ita-boot aban foti desizaun rezigna án,” dehan Antonio iha kampaña kandidatu Prezidente Repúblika númeru 6, Francisco Guterres Lú Olo iha Munisípiu Manatuto, Kuarta (09/03).
Bainhira Oan Soru la rezigna an, nia ezije ba PM Taur nu’udar Xefe Governu atu ezonera.
“Ha’u husu ba Primeiru Ministru foti desizaun ezonera membru governu ne’ebé laiha respeita ba Governu ne’ebe nia mós hola parte iha laran,” dehan nia.
Iha fatin hanesan, kandidatu PR, Lú Olo hatete, governu nu’udar orgaun koletivu ida ne’ebé Ministru, Vise Ministru, Sekretáriu sira hotu hola parte komponente governu nu’udar orgaun ezekutivu.
“Maibé ita-nia alin ne’e la hatene instituisaun estadu nian ne’e funsióna oinsa, tuun ba kraik, povu nia oin dehan governu Taur Matan Ruak nian ne’e inkapasidade, tanba ita-boot la dehan iha uma laran ne’eba hodi hadia inkapasidade ne’e atu sai kapasidade di’ak liu tan,” dehan nia.
Tuir Lú Olo, sentidu estadu mak ida ne’e duni atu koloka an iha estadu nia laran nu’udar servidór.
“Ha’u hanoin sentidu estadu mak ida ne’e duni atu kolaka nia an iha estadu nia laran nu’udar servidór, tuir ha’u nia fraku koñesimentu tama iha Ministru Agrikultura ka Ministru Saude nian la’os idaidak hatene nia area maibé sira hotu-hotu tenke hatene area hotu atu nune’e bele apoiu konjuntu hala’o dezenvolvimentu ba ita-nia rai no responde nesesidade povu nian.”
“Ita halo governu hanesan tiha fali privadu. Ha’u ko’alia de’it to’o iha ne’e maibé ha’u la adianta ho solusaun saida mak atu bele governu Primeiru Ministru Taur Matan Ruak hola fali ka adianta solusaun ne’e,” dehan Lú Olo.
