Prezidente Rede Feto, Zelia Fernandes hatete, haree ba partisipasaun feto iha eleisaun prezidensial tinan ida nee aas liu, kompara ho tinan hirak liu ba.
“Organizasaun Rede Feto nia haree ba periodu eleisaun prezidensial tinan nee, ita haree katak partisipasaun feto nian aas tebes kompara ho eleisaun sira iha tinan hirak liu ba. Agora dadauk ita iha kandidatu feto na'in haat neebé partisipa iha eleisaun tinan ne'e, ida ne'e nudar organizaun Rede Feto neebé luta ba iha direito feto nian, atu inklui foti desizaun ba iha prosesu dezenvolvimentu iha ita nia rai, ida ne'e di'ak tebes no sai hanesan orgullu id aba feto sira, tanba iha mós ninia reprezentante feto maluk sira ne'ebé ho aten brani kandidata aan ba Prezidente Repúblika", dehan nia ba Online INDEPENDENTE, via telephone kinta foin lalais (17/02).
Nia hatutan, parte Rede Feto sei la obriga no atu fó orientasaun ba nia membru sira atu hili kandidatu ida neebé, maibé importante mak hili kandidatu neebé merese duni atu ukun rai ida nee.
Tanba nee, nia apela ba feto maluk no sidadaun sira iha direitu atu hili no fihir tuir sira hakarak se mak merese no sai kandidatu di'ak liu ba sira.
Nunee, nia mós ba kandidatu feto sira atu hakbesik aan ba sekretariu Rede Feto hodi halo konsultasaun no rona mós hanoin balun husi Rede Reto.
"Nudar Organizaun Rede Feto nakloke aan ba kandidatu se deit atu mai, hodi rona saida mak sai preokupasaun no saida mak Rede Reto nia ezistensia ba kandidatu sira, atu nune'e para kandidatu sira bele toman iha sira nia knar bainhira sira eleitu,"nia afirma.
Nune'e, Kandidatu feto na’in haat neebé kompete iha Eleisaun Prezidensial tinan ne'e mak hanesan, Isabel da Costa Ferreira, Armanda Berta dos Santos, Angela Freitas no Milena Pires.
Aleinde, Kandidatu Prezidente Republika Periodu tinan 2022-2027 hamutuk na'in 16 inklui feto na'in ha'at.
Entretantu, prezidente Repúblika, Fransisco Guterres Lu-Olo dekreta ona loron kampaña eleitoral ne'ebé sei hahú iha loron 2 to'o 16 marsu no loron votasaun ba eleisaun prezidensial sei realiza iha 19 marsu 2022.
Asistente Editor: Saturnina da Costa
