Tuir Presidente Parlamentu Nasional, Arão Nóe hatete, antes ne’e opozisau husi Partidu FRETILIN no Partidu Demokratiku mak inisia projetu Lei Anti Korrupsaun ne’e hodi entrega mai iha PN. Tanba ne’e iha semana ida nia laran baixa ba iha asesor juridiku sira atu halo pareser legal tekniku hodi entrega ba komisaun.

“Lei Anti Korrupsaun ne’e ita entrega ona ba komisaun A atu diskute iha fulan ida nia laran hodi halo fali pareser mai iha plenaria atu kontinua diskute” dehan nia iha PN horisehik.

Presidente PN entrega ofisial projetu LAK ne’e simu direita husi Vise Presidente Komisaun A Francisco Vas Consellus atu lori ba komisaun ne’e hodi halo diskusaun.

Alende ne’e, komisariu Komisaun Anti Korupsaun KAK, Aderito Tilman nia mandatu remata iha loron 15 fulan-jullu 2018. Tanba ne’e governu halo ona proposta mai iha Parlamentu Nasionál hodi husu atu estende tan nia mandatu.

Tanba ne’e horisehik PN liu husi plenaria tau ajenda hodi halo eleisaun ba komisariu KAK ho pakote uniku.

Ba aprejentasaun kandidatura ne’e iha semana ne’e nia laran Presidente PN sei halo karta PM husu sira nia solisitasaun ba kandidatura komisairu KAK nian tanba ne’ iha loron 23 ne’e sei halo eleisaun ba komisariu KAK nian.