Deputadu husi Bankada PD, Adriano Nascimento husu ba governu atu aprezenta ona programa ba Parlamentu Nasional nune’e bele hetan ona aprovasaun hodi hadi’a povu nia moris.

Tuir Deputadu ne’e, durante fulan sia (9) nia laran povu Timor Leste moris iha inserteza nia laran no governu laiha osan atu halo investimentu públiku hodi responde povu nia preokupasaun.

“Lalika ona ita kee malu maibé aprezenta programa mai, di’ak ami apoiu, maibé kuandu la di’ak ami opozisaun iha ne’e atu kontrola governu entaun ami kritiku, maibé sei fó sujestaun,” dehan nia iha PN horseik.

Tuir nia, inserteza politika hamosu problema sosial barak hanesan industria balun komesa taka no funsionariu publiku ameasa atu hapara.

Atu responde ba asuntu hirak ne’e, nia hatutan, governu mak iha kompetensia atu bele rezolve.

“Maibé to’o oras ne’e formasaun governu mós seidauk loos (la hatene loos) bainhira mak atu hakotu problema hirak ne’e,” dehan nia.

Iha fatin hanesan Ministru Reformasaun Lejizlativa no Asuntu Parlamentar Fidelis Magalães hatete, tuir konstitisaun iha loron 30 nia laran governu tenke mai aprezenta nia programa iha PN.

“Programa governu loron rua ka tolu nia laran ami sei lori programa (mai) iha PN atu diskute,” dehan nia.

Fedelis afirma, programa VIII Governu Konstitusional sei diskute loron 2 nia laran tanba ne’e ba deputadu sira hein de’it.