PD ho FRETILIN halo koligasaun iha VII Governu, maibé Prezidente Repúblika (PR) foti desizaun hakat ba EA, partidu rua ne’e seidauk iha konsensu atu la’o hamutuk iha kampaña.

“Partidu Demokrátiku sempre kumpre multipartidária.Nune’e mós FRETILIN ne'ebé sai hanesan partidu istóriku. Sira mós defende ida ne’e, ne'ebé desizaun (koligasaun antes) ne’e ami foti iha konferénsia nasionál”, dehan Prezidente PD, Mariano Assanami Sabino, Komoro, Sábadu (27/1).

PD iha prinsípiu hodi lakohi kontra konstituisaun ne'ebé defende multipartidária. Tanba ne’e, labele hamutuk sai rua de'it hodi hili, atu nune’e ida bele manan absoluta ne’e viola ona konstituisaun.

Partidu rua ne’e sempre iha koordenasaun hodi hasoru situasaun polítika saida de'it, maibé PD iha karakter ne'ebé sempre kumpre konstituisaun no defende prinsípiu no valór ba konstrusaun estadu direitu demokrátiku tuir matadalan ne'ebé hakerek ona iha konstituisaun.

Nia dehan, kompromisu PD ba povu eleitór maka hakerek ona iha Planu Estratéjiku Dezenvolvimentu Nasionál, hadi'a estrada, bee moos, agrikultura, edukasaun, saúde, eletrisidade, portu, aeroportu. Karik povu fó fiar mai sei realiza hodi dezenvolve povu no nasaun.

Programa sira ne’e mensiona ne’e partidu FRETILIN mós defende ida ne’e iha Parlamentu Nasionál, maibé hetan rejeisaun. Tanba ne’e, sei kontinua apoiu malu hodi haklaken ba povu dalan ida tan atu vota.