Prezidente Bankada KHUNTO, José Agostinho hateten, intensaun harii governu tranzitóriu ne’e atu bele ezekuta desizaun Prezidente Repúblika nian ne'ebé hakarak ba eleisaun antesipada atu bele realiza eleisaun ida ne'ebé imparsiál no neutru.

“Atu nune’e ita nia eleisaun ne’e bele kredivel no justu”, dehan nia, iha Uma Fukun PN, horisehik.

Forma governu tranzitóriu ne’e iha prosedimentu bele inkilina membru partidu sira ne'ebé hetan asentu iha Parlamentu Nasionál ka ema independente hodi bele organiza eleisaun no evita mosu krime eleitorál iha prosesu eleisaun tomak.

“Ita hotu hatene ierarkiamente STAE submete hela ba VII Governu ida ne’e, depois mak organiza fali eleisaun, ne’e ita fó interrogasaun”, tenik nia.

Iha fatin hanesan, Prezidente Bankada FRETILIN, Francisco Miranda Branco hatete, atu harii fali governu tranzitóriu hodi organiza eleisaun antesipada ne’e laiha lójika.

Bloku AMP haree husi konstituisaun anotada, maibé iha ne’ebá mós hatete governu ne’e bele monu mós atu funsiona nafatin estadu governu ne’e bele mai aprezenta tan orsamentu.

Tanba ne’e, governu ne’e sei iha baze legál no lejitimidade nu’udar governu jestaun. Funsionamentu estadu nian bele dekreta no anunsia depois Prezidente Repúblika anunsia desizaun ba eleisaun antesipada.