Objetivu forma bloku KOP tanba, deputadu sira maioria mai husi partidu tolu ho sira nia konsentrasaun polítika ne'ebé sei sai hanesan forsa ida iha Parlamentu Nasionál.

“Konsentrasaun parlamentár husi partidu tolu sei aprezenta sira nia aan hanesan forsa parlamentár ida ne’ebé nia polítika konsentrada”, hateten Prezidente Bankada PLP, Fidelis Magalhães, iha Uma Fukun PN, horisehik.

Bloku ne’e signifika, kompozisaun husi partidu tolu, hodi transforma aan sai forsa polítika ida, tanba votu deputadu 35 maioria, kompara ho partidu ne'ebé forma governu ho votu 30 de'it.

Iha konsentrasaun polítika ne’e, sei haree mós ba entendimentu, tantu programasaun polítika ba partidu tolu no sai hanesan arte signifikativu ida.

“Servisu hamutuk ne’e, tanba atu define ami nia programa ne’ebé hanesan, hodi bele lori moris di’ak ba ita nia povu, defende interese nasaun, no hamutuk atu bele aprezenta alternativa programatiku ida ba nasaun,” hateten nia.

Konsentrasaun nivel polítika ne’e la’o di’ak loos ho klareza opozisaun tolu no formasaun forsa polítika ida iha PN, la iha problema.

Kona-ba sé mak atu sai dirijente ba bloku KOP, Fidelis dehan, ne’e bloku entre partidu tolu, ne’ebé laiha ida mak dirije mesak.

Maibé, bloku ida ne’e kompostu husi partidu tolu, bazeia ba votu partidu ne’ebé hetan votu barak liu maka partidu CNRT.

Tanba CNRT nia kadeira 22, PLP iha kadeira 8 no KHUNTO kadeira iha 5, no lider naturál ba iha diskusaun kolejiál respeita malu ne’e maka partidu CNRT.