Anita da Conçeisão, husi Munisipiu Lautem, hatete, tuir informasaun ne’ebé sira hetan husi Comisaun Nasional Eleisaun (CNE) katak, iha kartaun eleitoral mak bele vota iha sentru paraleleu sira ne’ebé estabelese ona, maibé to’o iha fatin votasaun sira labele vota.
“Ami mai tiha iha fatin ne’e atu vota, maibé imi la fó fali ne’e oinsa?, imi uza sistema saida mak labele fali fó ami vota,”nia kestiona.
Nia hatutan, sira priense ona formulariu, maibé atu vota naran laiha fali lista no parte husi fiskais sira haruka ba halo tan deklarasaun.
Aleinde, ba sira seluk ne’ebé seidauk priense formulariu naran iha fali lista eleitoral nian.
Tanba ne’e, nia husu ba CNE no STAE atu bele haree asuntu ne’e, atu komunidade sira mós bele ezerse sira nia direitu nuudar sidadaun.
“Ami husu ba CNE atu rejolve oinsa, atu mai sira ne’ebé mai ona iha fatin ida ne’e (sentru votasaun paralelu) iha direitu atu vota, tanba ami iha ne’e, atu ba fali ami nia munisipiu vota mós labele ona,”dehan nia.
Iha fatin hanesan, Gabriel Hilario Fernandes, husi Munisipiu Vikeke, hatete, sira nia naran iha ona lista, maibé fiskais sira haruka fila sira ba priense tan formulariu. Maibé antes ne’e, sira laiha informasaun kona-ba sidadaun ne’ebé mai husi munisipiu atu vota iha sentru paralelu presiza halo deklarasaun ou preinse formulariu ne’e.
“Ami la rona informasaun dehan, bainhira atu ba vota iha sentru paralelu tenki priense formulariu nee,”dehan nia.
Enkuantu, nia haktuir, ba estudante sira ne’ebé submete ona lista ba Ministeriu Edukasaun Juventude no Desportu (MEJD), maibé mós balun la vota tanba naran laiha lista.
Entretantu Sekretariadu Tekniku ba Administrasaun Eleitoral (STAE), rekonese failansu balun mosu iha sentru votasaun paralelu, maibé situasaun jerál iha eleisaun prezidensial periodu 2022-2027 rai laran no rai liur situasaun la'o di'ak.
Diretór Jerál STAE, Acilino Manuel Branco hateten, situasaun eleisaun eleisaun Prezidente Republika iha territoriu nasional no diaspora maioria la'o di'ak.
"Agora situasaun kiik sira balun, tantu akontese iha fatin ida no rua, maibe barak liu ne'e iha Dili.
Maibe la'os sentru votasaun hot-hotu, so de'it iha sentru votasaun paralelu, ita boot sira asesu ona,”dehan Acilino, iha edifisiu STAE, Kaikoli, Sabadu (19/03).
Tuir informasaun ne'ebé nia hetan katak laos maioria eleitór mak la vota iha sentru votasaun paralelu.
Eleitór sira ne'ebé ezerse nia direitu iha sentru votasaun paralelu ne'e tuir regras.
Tuir lista eleitór paralelu hamutuk total 4,030, sira sei vota iha Sentru Votasaun Paralelu tolu iha Dili.
"Ohin situasaun balun akontese eleitores sira mai reklama ne'e, eleitores sira balun la ba resensia iha prosesu ne'ebé mak STAE estabelese ona," tenik nia.
Tuir observasaun online Independente iha terrenu katak, mosu duni failansu lista eleitoral paralelu iha sentru votasaun Eskola Tekniku Vokasional Bekora.
Tanba ne’e, kuaze eleitór 200 mak hato’o sira nia reklamasaun no husu ekipa tekniku eleitoral bele rejolve failansu sira. Enkuantu ekipa tekniku STAE no Fiskais sira iha terrenu husu ba eleitór sira bele priense fali formulariu mak bele fó sira nia votu.
Hafoin notisia ne’e públika, redasaun online Independente seidauk halo fali konfirmasaun ba parte STAE kona-ba prosesu rejolve assuntu ne’e bazeia ba reklamasaun husi eleitór paralelu.
