Iha nia diskursu, kandidatu Francisco Guterres Lu-Olo husu ba Ainaru oan sira atu hakat hamutuk hodi  ba oin no sai Prezidente Repúblika ba povu Timor Leste tomak.

“Prezidente iha kna’ar ba promulga lei no veto lei, maibé la'ós atu veto lei ne’e atu defende ninia interese partidu ninian, tanba ha’u nia partidu iha tiha ona, entaun ha’u sei kumpre ha’u nia knaar tuir konstituisaun. Prezidente Repúblika labele halo tátika oi-oin atu hasoru fali Governu ho Parlamentu,” dehan Lu-Olo iha nia kampaíña dalima iha Munisípiu Ainaru Vila, Tersa (07/03).

Nia hatutan, Prezidente Repúblika sai hanesan defensór ba konstituisaun no lei sira. Tinan ida ne’e sei nia mak eleitu ba Prezidente Repúblika, nia sei ba jura iha konstituisaun iha povu nia oin katak, nia jura atu kumpre konstituisaun ida ne’e, tanba konstituisaun mak sai hanesan lei inan ba nasaun tomak.

Nia dehan, Prezidente Repúblika tenke hala’o de’it nia knaar Xefe Estadu nian, maibé Prezidente Repúblika mak loron kalan ba hamutuk fali ho povu atu sukit fali Governu, ne’e la'ós Prezidente Repúblika.

“Lu-Olo sei la halo hanesan ne’e ida, ema balu hateten hanesan ne’e, se Lu-Olo mak ba Prezidente Repúblika, nia sei halo tuir de’it Governu ho Parlamentu nasionál nia hakarak. Konstituisaun ida ne’e hau mak halo la signifika katak la'ós atu kontra malu hela de’it,” relata Lu-Olo.

Nia salienta, Prezidente órgaun ida ne'ebé ketak, Governu órgaun seluk, PN mós órgaun soberania seluk no Tribunál sira órgaun seluk ida ne’ebé tesi lia povu TL hotu nian, bainhira iha naksalak , tuir lei TL nian.

Lu-Olo afirma, Prezidente labele kontra Governu nia programa, tanba Governu nia programa iha kedas, no hetan aprovasaun husi PN.

Nia hatutan, Prezidente Repúblika mak garante unidade nasionál no unidade Estadu nian, dignidade territóriu, independénsia no soberania nasaun nian, no regula funsionamentu instituisaun.