Kandidatu husi Partidu Demokratiku PD, Assanami, submete dokumentus ho lista apoiante 10,567. Lere ho apoiante 9,400 no Rogerio ho apoiante 6,410.

Sekretáriu Jerál PD, Antonio da Conceição hatete, lista proponente hirak ne’ebé PD submete ba TR hetan rejistu legal husi apoiante sira hotu ne’ebé mai husi Munisípiu 12 inklui RAEOA.

“Ohin Partidu Demokrátiku mai ofisializa ona rejistu kandidatu Prezidente (Repúblika) Mariano Assanami Sabino nu’udar kandidatu ne’ebé mak ami deside ona husi konvensaun.,” dehan nia iha edifisiu TR, Tersa (02/02).

Iha sorin seluk, portavoz ekipa susesu Lere Anan Timur, Vito Simoes informa, sira submete ona dokumentus husi kandidatu independente Lere Anan Timur iha TR.

“Lista husi kandidatu jenerál Lere nian tama ona iha Tribunal Rekursu, ami fiar buat hotu sei lao tuir prosesu, maibé ho espíritu domin bele dehan ami bele, tanba lista ne’ebé aprezenta 9,400 resin,” dehan nia iha TR.

Entretantu, ekipa susesu kandidatu PR Rogério Tiago Lobato, Mateus Maria de Jesus informa, sira rejistu sira-nia kandidatura iha TR ho proponente 6,410.

“Ami-nia prinsipiu tuir ami-nia prezidente hatete ami fiar sei garante estabilidade nasionál ba povu iha rai ida ne’e,” dehan nia.

TR Hahú Verifika

Prezidente Tribunál Rekursu, Deolindo dos Santos hatete, hafoin Prezidente Repúblika dekreta data eleisaun TR hahú loke prosesu rejistu ba kandidatu PR to’o 4 Fevereiru 2022.

“Husi prosesu ne’ebé Tribunal hahú iha loron 17 Janeiru, normalmente iha primeira semana, segunda semana, laiha kandidatura ruma atu aprezenta nia kandidatura iha ne’e, maibé ultima semana komesa iha ona.”

“Ohin (horseik) mós kandidatura balun mak mai aprezenta ona, tanba ne’e total hamutuk maizumenus 11 kandidatura mak mai aprezenta ona sira-nia dokumentus,” informa Deolindo iha TR, Kuarta (02/02).

Hafoin kandidatu sira aprezenta hotu dokumentus, nia dehan, TR bele hahú ona halo verifikasaun ba sira-nia dokumentus.

Husi kandidatu ne’ebé rejistu ona, nia hatete, iha kandidatu hitu mak TR haruka sira-nia dokumentus ba STAE hodi ajuda halo verifikasaun no kandidatu haat mak STAE haruka fila ona ba TR no 3 seluk sei iha STAE.

“Lista ho dokumentu sira ne’e ba iha STAE par atu verifika serake sira-nia proponte ne’e idade to’o duni ona atu sai proponente ka lae no nia konklui nia tinan atu hili Prezidente ka lae. Segundo, atu verifika mós kandidatura sira ne’e proponente iha kada munisipiu to’o 100 ka lae,’’ dehan nia.

Iha verifikasaun ne’e, nia hatete, iha mós posibilidade atu redus númeru apoainte ne’ebé kada kandidatu aprezenta.

“Ezemplu kandidatura ne’e mai ho ema rihun 6 maibé bele mós redus tiha balun tanba balun bele tinan seidauk to’o no balun bele mate ona mais konklui nafatin sira-nia kartaun elitoral hodi junta hamutuk iha dokumentus, ida ne’e mós dala-ruma la konsidera.”

Tan ne’e, nia hatutan, TR husu ajuda ba STAE atu serbisu hirak ne’e bele la’o ho di’ak.