Isabel da Costa Fereira, la’os naran foun iha mundu politika Timor-Leste. La’os tanba nia nu’udar espoza husi lider politiku ida ne’ebé asume ona kargu Prezidente Repúblika no Primeiru Ministru, maibé mós tanba nia nu’udar fundadór husi partidu politiku ida, Partidu Libertasaun Popular (PLP) ne’ebé ninia kaben, Taur Matan Ruak, lidera.
Maske hanesan espoza ema númeru ida iha PLP no sai mós fundadór PLP, maibé espoza husi eis Prezidente Repúblika no atual Primeiru Ministru, Taur Matan Ruak, ne’e deside hodi kandidata an ba PR liu husi dalan independente.
Isabel da Costa Ferreira, oan-feto husi Mateus Ferreira no Ana Flora de Jesus Ferreira, moris iha Same, Munisipiu Manufahi iha 15 Abril 1975.
Oan ba dala 12 husi maun-alin na’in 13 ne’e hahú ninia
ensinu baziku iha tinan 1980 no remata ninia eskola sekundaria iha tinan 1993. Iha tinan 1998, nia remata ninia estudu iha direitu nian iha Universidade Nasional Denpasar, Bali, Indonezia.
Isabel hahú ninia kareira profisional ne’ebé iha relasaun ho issu direitus umanus no ativamente kondena violasaun ne’ebé hala’o durante okupasaun militar Indonezia.
Iha tinan 1998 no 1999, nia hala’o knar nu’udar Koordenadora Jeral ONG "Kontras Timor-Timur" no iha tinan 199-2001, Isabel asume kargu nu’udar Diretora Komisaun Direitus Umanus Timor Lorosa’e (CDHTL) iha tinan 1999-2001.
Iha tinan 2001, nia hetan fiar hodi reprezenta partidu UDT nu’udar membru Asembleia Konstituante. Nia dedika an, liu-liu ba hakerek artigu Konstitusaun Timor-Leste ne’ebé iha relasaun ho direitus umanus.
Iha tinan 2001, Isabel kaben ho Taur Matan Ruak no hetan oan feto na’in rua, Lola no Tamarisa no oan mane ida, Quesadhip.
Iha governu tranzisaun Nasaun Unidus no hafoin restaurasaun independensia, Isabel responsavel ba knar oioin iha area umanidade, politika no direitus umanus, espesial nu’udar Vise Prezidente Kruz Vermeila Timor-Leste (CVTL) husi tinan 2002 to’o 2005, Konsultór Direitus Umanus Primeiru Ministru husi tinan 2001 to’o 2006, Vise Ministru Justisa iha tinan 2006, no membru Komisaun Verdade no Amizadu (CVA) husi tinan 2005 to’o 2008.
Hafoin remata ninia knar iha CVA, Isabel responsavel ba area balun iha ambiente aperelu estadu, liu-liu: Prezidente Sekretariadu Apoiu ba Promosaun Polisia Nasionál Timor-Leste, husi tinan 2009 to’o 2010; Prezidente Komisaun Akompañamentu Prosesu Promosaun PNTL, husi tinan 2010 to’o 2012; Komisaria Komisaun Funsaun Públika, husi tinan 2011 to’o tinan 2014; no Asesir Juridiku Sekretariu Estadu Seguransa, husi tinan 2009 to’o tinan 2015; Espoza Prezidente Repúbllika Timor-Leste, entre 20 Maiu 2012 to’o 20 Maiu 2017; Asesor Juridiku Ministériu Interior, husi Fevereiru 2015 to’o Juñu 2015; no Advogadu Labarik no Asesor Ministru Edukasaun & Advokasia Labarik, dezde Setembru 2015.
Aleinde esperensia hirak ne’e, Isabel mós sei iha esperensia lubuk ida iha ninia envolvimentu iha organizasaun no atividade hirak ne’ebé foka liu kona-ba direitus umanus.
