Kandidatu na’in 17 ne’ebé rejistu ona iha TR mak Virgilio Guterres ho proponente 6.275, Costansio Pinto ho proponente 5.000, Lere Anan Timur  ho proponentes 9.000, Francisco Guterres Lú Olo ho proponentes 9.000, José Ramos Horta ho proponentes 5.000, Rogerio Tiago Lobato ho proponentes 6.000, Mariano Assanami Sabino ho proponentes 10.567, Isabel da Costa Fereira ho proponentes 5.000, Armanda Berta dos Santos ho proponentes 8.641, Hermes da Rosa Correira Barros  ho proponentes 6.363, Felizberto Araujo Duarte ho proponentes 7.000, Luis Tilman ho proponentes 5.000, Martinho Gusmão ho proponentes 10.000, Antero Bendito ho proponentes 6.000, Anacleto Freitas ho proponentes 6.000, Milena Pires no Angela Freitas.

Diretór Jeral Sekretariadu Tekniku Administrasaun Eleitoral (STAE), Acilino Manuel Branco informa, to’o horseik STAE konsege konklui ona verifikasaun ba kandidatu PR na’in 7.

Kandidatu ne’ebé STAE konklui ona verifikasaun mak Milena Pires, Felizberto Duarte Araújo, Hermes da Costa Correia Barros, José Ramos Horta, Angela Freitas, Isabel Ferreira, no Francisco Guterres Lú Olo.

“Kompetensia ami nian atu halo de’it verifikasaun ba lista proponentes no  informasaun sira ne’e ami informa fila-fali ba iha Tribunál depois Tribunál mak sei haree hodi halo notifikasaun ba iha prosesu tomak,” dehan Acilino iha nia knar-fatin, Kaikoli, Kinta (03/02).

Provizoriu Eleitór na’in 854,756

Sekretariadu Tekniku Administrasaun Eleitoral (STAE) rejista ona lista provizoriu eleitór ba eleisaun prezidensial hamutuk na’in 854,756 no sei kontinua halo sinkronizasaun hodi hetan lista finál.

Diretór Jeral STAE, Acilino Manuel Branco hatete, prosesu resensiamentu eleitorál no atualiza baze dadus iha rai laran no rai li’ur remata iha 14 Janeiru 2022.

Maske nune’e, nia dehan, iha mós sidadaun balun ne’ebé seidauk resensia no balun seidauk atualiza.

“Prosesu ita taka ona no tuir lei katak ita sei halo atendimentu depois Tribunal Rekursu fó sai rezultadu eleisaun nian,” dehan nia.

Kona-ba prosesu final, nia hatete, tuir lei, STAE sei publika loron 30 molok eleisaun.

“Parese iha loron 17 Fevereiru ka 18 Fevereiru STAE foin mak fó sai loloos númeru ofisial eleitór ne’ebé mak sei partisipa iha eleisaun prezidensial 2022.”

Hahú iha 1 to’o 8 Fevereiru, nia hatutan, brigade STAE halo espozisaun lista eleitor iha nivel suku idaidak.

“Lista ne’ebé ita hetan ona ne’e ita produs, ita koloka iha fatin-fatin par depois eleitor idaidak ba konfirma ninia naran no hela fatin. Dadus ruma sala karik priense formulariu depois STAE sei rekoila fila-fali hodi halo koresaun,” nia informa.