Nia hatutan, kuandu hakarak manan eleisaun prezidensiál ka lejizlativa, la’ós ho meius hatún malu para bele konvense eleitoradu, maibé aprezenta programa servisu kandidatu ka partidu nian.

Horta reforsa, la’ós lider na’in tolu ne’e mak kandidata ba prezidente repúblika, tanba ne’e sira lalika kritika malu.

“Ha’u hanoin konsentra de’it ba kualidade ne’ebé ha’u-nia tiu Lu-Olo nian, kualidade saida mak tiu Lu-Olo iha para ba prezidente”, dehan nia, iha Komoro, horisehik.

Horta dehan, Presidente Repúblika (PR), Taur Matan Ruak ninia mandatu to’o 20 Maiu 2017. Tanba ne’e, tenke konsentra ba prezidénsia nia servisu. Haree dekretu lei promulga ka lae. Tau matan mós ba dadur sira iha Bekora no Gleno.

“Iha tinan lima laran ha’u-nia tiun Taur Matan Ruak halo indultu haat de’it. Koitadu ema lubuk ida iha ne’ebá hein prezidente atu fó indultu ka lae,” nia hateten.

Ne’e duni, husu ba Xefe Estadu atu haree dadur sira iha Gleno no Bekora, tanba barak krime ladún boot. Nune’e, prizaun Bekora nakonu ho ema atus lima-resin, ne’e liu ona ninia estandarte atus rua.

Premiadu Nobel ba Pás ne’e dehan, Prezidente Repúblika tenke ko’alia ona kona-ba situasaun seguransa. Presiza halo reuniaun ho FALINTIL-Forsa Defeza Timor-Leste (F-FDTL) no Polisia Nasionál Timor-Leste (PNTL), inklui mós ho ministru interiór hodi kontribui no garante estabilidade durante períodu eleitorál.

Nia afirma, partidu sira labele hatama demais ‘kanuru tohar’, tanba eleisaun parlamentár seidauk hahú. Ne’e duni agora konsentra uluk ba iha eleisaun prezidensiál.

“Hotu-hotu kontribui (ba funu). Povu hatene tanba tinan 15 ona, ne’ebé labele ko'alia fali kontribui ou la kontribui,” dehan nia.

Nune’e, apela mós ba deputadu Parlamentu Nasionál atu fokus ba sira nia servisu. Lalika buka atu kritika malu de’it iha Uma Fukun PN, tanba sira la’ós kandidatu Prezidente Repúblika.