"Ha'u sente kontente tebes, ha'u hanesan ema ho defisiénsia mai hakarak fó apoiu votus ba Kandidatu Prezidente Repúblika Assanami Sabino, tanba ha'u haree iha mídia sosial no iha radio, ita nia kandidatu ne'e halo ona buat barak ba ami ho defisiensia, no mós hakbesik ba idozu sira no ba ema ne'ebé kbi'it laek,"dehan EhD, Abilio de Araújo iha ambitu lansamentu Númeru Sorteiu kandidatu PR nú.16, iha Tasi-Tolu, domingo horiseik (20/02).
Nia akresenta, nia parte senti triste, tanba iha tinan hirak liu ba ema ho defisiénsia barak mak fó sira nia votus ba kandidatu Prezidente Repúblika, maibé sira la fó prioridade no la tau atensaun ba ema ho defisiénsia sira.
"Ho ida ne'e mak ha'u ho familia sira hakarak fó votus ba maun Mariano Assanami Sabino, ami ho laran tomak fó ami nia votus ida ba kandidatu ne'ebé hakarak halo mudansa. Enkuantu, bainhira hala’o debate kona ba Orsamentu Jeral Estadu tinan 2022 nian, kandidatu refere, sai hanesan proponente hodi husu ba Governu atu aumenta tan osan ba idozus no ema ho defisiénsia sira, ida nee ne'e ami sente kontente tebes,”tenik nia.
Iha Fatin hanesan, Angela Souza Carvalho hanesan idozu husi Suku Bairu-Píte, deklara, hamutuk ho familia uma laran, hanesan oan no bei-oan sira sei fó sira nia votus ba Kandidatu Prezidente Repúblika, Mariano Assanami Sabino. Tanba haree kandidatu nee, nia domin boot liu, hodi tulun no sai proponente ba aumenta subsidiu idozu no invalides, dolar amerikanu $50 kada fulan.
Ho nunee, Angela deklara antes nee, nia involve aan iha Partidu Fretelin, maibé tanba Kandidatu Assanami hanesan jerasaun foun no nudar joven ida, nune'e nia desidi afilla ba Partidu Demokratiku hodi fó votu ba kandidatu refere, hodi bele sai Prezidente ida ba povo nia preokupasaun.
"Ami hakarak Kandidatu PR ne'ebé eleitu iha periodo tinan lima nia laran, hodi halo buat di'ak ba futuru oan sira nian, tanba ami loron badak ba dadaun ona, imi nia lembransa mak ha'u rai hela ne'e. Haree ba realidade hanesan foin dadaun ita nia kandidatu prezidente rasik mak sai matan ba hasa'e tan osan idozu nian," tenik nia.
Entretantu, iha loron 20 fevereiru 2022, Prezidente Partidu Demokratiku Mariano Assanami Sabino, deklara ofisialmente kandidatu aan ba Prezidente Repúblika iha periodu tinan lima ho númeru sorteiu 16.
Enkuantu, Prezidente Repúblika Francisco Guterres Lú Olo dekreta ona loron kampaña ba Eleisaun, hahú iha loron 2 to'o 16 marsu no loron votasaun ba Eleisaun Prezidensial realiza iha loron 19 marsu 2022.
Asistente Editor: Saturnina da Costa
